36 jyldan astam ýaqyt boiy áýe kemesin basqaryp, Air Astana kompaniiasynda ushqysh bolyp qyzmet atqarǵan Qanat Sidenǵaliev ómirden ótti, dep habarlaidy «Ult aqparat».
Bul týraly QR Indýstriia jáne infraqurylymdyq damý ministrligi Azamattyq aviatsiia komiteti habarlady.
«QR Indýstriia jáne infraqurylymdyq damý ministrligi Azamattyq aviatsiia komiteti Qanat Mútálipuly Sidenǵalievtiń dúnieden ótýine baĭlanysty marqumnyń týǵan-týystary men jaqyndarynyń qaĭǵysyna ortaqtasyp kóńil aĭtady. Qanat Mútálipuly óz isiniń naǵyz mamany edi. 36 jyldan astam ýaqyt aviatsiia salasynda qyzmet etip, túrli áýe kemeleriniń ushqyshy bolǵan» delingen atalǵan komitet habarlamasynda.
Air Astana kompaniiasynyń atap ótýinshe, Qanat Sidenǵaliev 2004 jyldyń mamyrynan beri áýe kemesiniń komandiri retinde Fokker-50 jáne Airbus320 ushaqtaryn basqarǵan.
«Ornyn eshkim basa almas kóshbasshy, uiymdastyrýshy jáne «Aviator» jazǵy kásipodaq tóraǵasy boldy. Barlyq ýaqytta da áriptesterine qol ushyn berip, olardy ómirlik qiyn sátterde qoldap otyrdy. Otbasylyq balalar úilerine kómek uiymdastyryp, oǵan belsendi qatysty. Áriptesteriniń balalary úshin únemi Jańa jyldyq mereke uiymdastyryp, ushqyshtarymyzdyń ál-aýqaty men jan-dúniesi úshin únemi alańdap júretin. Kez kelgen jaǵdaida oǵan arqa súiep, kómek beretindigine senimdi bolýshy edik. Qanat pandemiia jaǵdaiynda otandastarymyzdy elge alyp kelý boiynsha repatriatsiialyq reister baǵdarlamasyna qatysty. Ómiriniń sońǵy sátine deiin kásipodaq jumysyna jáne áriptesteriniń moraldyq jai-kúiine alańdaýshylyq tanytty», - dep eske alady áriptesteri.
Qanat Mútálipuly 1963 jyldyń 5 qańtarynda dúniege kelgen. 1980 jyly Lomonosov atyndaǵy orta mektepti bitirgennen keiin Aqtóbedegi joǵary aviatsiia ýchilishesine túsken. Eńbek jolyn Atyraý qalasynyń áýejaiynan bastaǵan.
