Parlament Senatynyń tóraǵasy Dariǵa Nazarbaeva pandemiia saldaryna qatysty pikir bildirdi, dep habarlaidy QazAqparat.
«Kópshilikti alańdatyp júrgen birneshe máselege toqtalǵym kelip otyr.
Pandemiia búkil álem úshin naǵyz synaq boldy. Ol álemdik ekonomikany eshqashan bolmaǵan kólemde qysqartyp, munai naryǵynda baǵanyń tómendeýine, kásiporyndar men turǵyndar sharýashylyqtaryn asa qiyn jaǵdaiǵa alyp keldi. Munyń saldary ár adamnyń ómirine uzaq ýaqyt áser etetini anyq. Bul jaǵdaidy durys baǵalai bilýimiz kerek. Shyǵyndardy azaitý qajet bolady. Bizder endi búgingi kúnniń shyndyǵymen jańasha ómir súrip júrmiz», - dedi D. Nazarbaeva Parlament Senatynyń jalpy otyrysynda.
Osy oraida ol 24 sáýirde Qaýipsizdik Keńesiniń otyrysy ótkenin, onda Elbasy Nursultan Nazarbaev sóz sóilegenin eske saldy.
«27 sáýirde Memleket basshysy Qasym-Jomart Toqaevtyń Málimdemesi jariialandy. El basshylyǵynyń negizgi paiymy – daǵdarystan keiingi kezeńge, ekonomikalyq, áleýmettik, qoǵamdyq ómirdi tótenshe jaǵdai rejiminen shyǵarýǵa daiyndyqty bastaý kerek. Bul barlyq memlekettik organdarmen qatar, bizdiń aldymyzǵa da, qurmetti depýtattar, birqatar mindetter men máselelerdi qoiady», - dedi Senat tóraǵasy.
