Pandemiia bastalǵaly joǵary oqý oryndary stýdentterdi qashyqtan oqytyp keledi. Oqytýdyń mundai formaty JOO-lardyń biýdjetine qalai áser etti? Bul suraqqa Ortalyq kommýnikatsiialar qyzmetinde ótken baspasóz máslihatynda QR Bilim jáne ǵylym vitse-ministri Miras Dáýlenov jaýap berdi, dep habarlaidy "Ult aqparat".
«Nelikten stýdentterdiń oqý aqysy tómendemeidi degen suraq bizge buryn da joldanǵan edi. Bul rette nege mán berý kerek? Joǵary oqý oryndary men kolledjder qashyqtan oqytý formatyna kóshken kezde osy bilim berý uiymdarynyń shyǵyny shyntýaitynda óspese kemigen joq. Nelikten? Eń aldymen olarǵa sapaly tsifrlyq kontent quryp, tsifrlyq bilim berý platformalaryn ustap turý úshin qarajat qajet boldy. Odan bólek JOO-lar men kolledjder oqytý formatyna jańa amal-ádisterdi jolǵa qoiýǵa mindetteldi. JOO-lar týraly aitar bolsaq, olarǵa osynaý kúrdeli jaǵdaida serverlik, bailanysty jáne internet jyldamdyǵyn arttyrý mindeti júkteldi. Internet jiiligin jyldamdatpasa, stýdentterge bilim berý qiynǵa ainalar edi», - dedi vitse-ministr.
Miras Dáýlenov onyń ústine JOO-lardyń basshylyǵy muǵalimderge ailyǵyn tóleý mindetin de oryndaǵanyn atap ótti.
«Mysaly sol bilim berý uiymdary turǵan nysandar eshkimge jalǵa berilgen joq. Tiisinshe ony ustap turýdyń ózi de qarajatty talap eteri sózsiz. Sondyqtan osy shyǵyndardyń bárin qosa, Bilim jáne ǵylym ministrligi oqý jyly bastalar aldynda JOO basshylaryna oqý aqysyn qymbattatpaýy kerektigi týraly hat joldady. Osylaisha, JOO-lar oqý aqysyn qymbattatqan joq», - dedi ol.
