Memleket basshysy Qasym-Jomart Toqaev eldegi azyq-túliktiń qymbattaýy jóninde pikir bildirdi, dep habarlaidy QazAqparat.
«Daǵdarysqa qarsy qabyldanǵan fiskaldyq quiýlar, jumsaq aqsha-nesie saiasaty siiaqty sharalar kezinde infliatsiia qarqyny jedeldedi. Álemdik saýdanyń jandanýy jáne suranys pen usynystyń teńgerimsizdigi bul máseleni odan ári ýshyqtyrýda. BUU Azyq-túlik jáne aýylsharýashylyq uiymynyń málimetterinshe, azyq-túliktiń álemdik baǵasy 40%-ǵa kóterildi – bul onjyldyqtaǵy eń joǵary kórsetkish. Mundai jaǵdaida eldegi infliatsiia alǵashqy jarty jylda 7,9%-dy qurady. Bul belgilengen 4-6% nysanaly dálizinen áldeqaida joǵary», - dedi Prezident Úkimettiń keńeitilgen otyrysynda.
Q. Toqaev azyq-túliktiń qymbattaýy eń ótkir másele bolyp otyrǵanyn jetkizdi.
«Pandemiia azyq-túlik qaýipsizdigi turǵysynan eldiń osaldyǵyn ashyp kórsetti. Árine biz Qazaqstannyń ekonomikasy ashyq ekenin, tiisinshe import nemese eksport úshin óz naryqtarymyzdy jaba almaitynymyzdy túsinemiz. Bul sala úshin de, tutynýshylar úshin de keri áser etedi. Sonymen birge, otandyq aýyl sharýashylyǵy salasynyń ishki naryqty bazalyq ónimdermen qamtamasyz ete almaýy týraly syn da óte oryndy.
Óndiristik shyǵyndardan bólek, baǵanyń negizgi faktorlary retinde maýsymdyq pen kóleńkeli deldaldyq shemalardy ataýǵa bolady. Maýsymdyqty ataýyna qarap-aq jyl saiyn kútiletin nárse ekeni, demek ony basqarýǵa da bolatyny túsinikti. Bul máseleniń sheshimi ónimdi kelesi maýsymǵa deiin saqtaýdyń zamanaýi jáne qoljetimdi infraqurylymyn qurýǵa negizdelgen», - dedi Qasym-Jomart Toqaev.
Prezident Úkimet pen ákimdikterge kókónis ónimderin saqtaityn qoimalar salý jáne jańǵyrtý josparyn ázirleýdi tapsyrdy.
