Seisenbi kúni keshke palestindik radikaldy toptar Izrailge qarai 130-dan astam zymyran jiberdi. BAQ adam shyǵyny baryn habarlady, alaida olardyń sany belgisiz, dep jazady Azattyq.
Zymyrandardyń biri Tel-Avivten mańyndaǵy eldi mekenderge qatynaityn jolaýshylar avtobýsynyń birine túsken.
Zymyran shabýylyna bailanysty Ben Gýrion atyndaǵy áýejai jumysy toqtaǵan. Ǵimarattan adamdardy evakýatsiialaǵan. Al Tel-Avivke barýy tiis reisterdi Kiprge jiberip jatyr.
Ótken táýlikte Gaza sektorynan Izrailge qarai júzdegen zymyran ushyrylǵan. BAQ 600 zymyran ushyrylǵanyn jazdy. Olardyń basym bóligin Izraildiń zymyranǵa qarsy qorǵanys júiesi atyp túsirgen. Birneshe zymyran nysanaǵa dóp tigen.
Seisenbige qaraǵan túni Izrail aqparat quraldary Ashkelon qalasynyń eki turǵynynyń qaza bolǵanyn habarlady. Ondaǵan adam jaralanǵan.
Zymyran shabýylyn HAMAS pen "Islam djihad" radikaldy toptary moinyna aldy.
Izraildiń qorǵanys armiiasy Palestinanyń júz shaqty áskeri nysanyn atqylady. Olardyń bir bóligi turǵyn úilermen qatar ornalasqan. Seisenbi kúni keshke palestinalyq BAQ birneshe turǵyn úidiń qiraǵanyn, ondaǵan adamnyń zardap shekkenin habarlady. Izrail taraby tek radikaldy toptar shoǵyrlanǵan nysandardy atqylaǵanyn málimdedi.
Birneshe arab otbasy Shyǵys Ierýsalimnen kóshirilýi múmkin degen aqparat taraǵannan keiin aimaqta sońǵy birneshe kúnde jaǵdai ýshyqqan. Izrail sotynyń sheshimi palestinalyqtardy narazy etti. 7 mamyrda keshke olar politseilerge tas atyp, bótelke, armatýra laqtyrǵan.
Qaqtyǵysty retteý úshin politsiia Hram taýyna baratyn joldardy bekitti. Palestina aqparat quraldarynyń habarlaýynsha, izraildikter rezeńke oq atyp, qulaq tundyratyn granata qoldanǵan. Biraz ýaqyttan soń politsiia Ál-Aqsa meshitine shtýrmmen basyp kirip, jurtty kúshpen taratqan.
Palestindikterdi kóshirý týraly sot sheshimin qaraý keiinge qalǵan, biraq qaqtyǵys jalǵasyp jatyr.
BUU, Eýroodaq pen AQSh taraptardy sabyrǵa shaqyrdy.
