سەيسەنبٸ كٷنٸ كەشكە پالەستيندٸك راديكالدى توپتار يزرايلگە قاراي 130-دان استام زىمىران جٸبەردٸ. باق ادام شىعىنى بارىن حابارلادى, الايدا ولاردىڭ سانى بەلگٸسٸز, دەپ جازادى ازاتتىق.
زىمىرانداردىڭ بٸرٸ تەل-اۆيۆتەن ماڭىنداعى ەلدٸ مەكەندەرگە قاتىنايتىن جولاۋشىلار اۆتوبۋسىنىڭ بٸرٸنە تٷسكەن.
زىمىران شابۋىلىنا بايلانىستى بەن گۋريون اتىنداعى ەۋەجاي جۇمىسى توقتاعان. عيماراتتان ادامداردى ەۆاكۋاتسييالاعان. ال تەل-اۆيۆكە بارۋى تيٸس رەيستەردٸ كيپرگە جٸبەرٸپ جاتىر.
ٶتكەن تەۋلٸكتە گازا سەكتورىنان يزرايلگە قاراي جٷزدەگەن زىمىران ۇشىرىلعان. باق 600 زىمىران ۇشىرىلعانىن جازدى. ولاردىڭ باسىم بٶلٸگٸن يزرايلدٸڭ زىمىرانعا قارسى قورعانىس جٷيەسٸ اتىپ تٷسٸرگەن. بٸرنەشە زىمىران نىساناعا دٶپ تيگەن.
سەيسەنبٸگە قاراعان تٷنٸ يزرايل اقپارات قۇرالدارى اشكەلون قالاسىنىڭ ەكٸ تۇرعىنىنىڭ قازا بولعانىن حابارلادى. ونداعان ادام جارالانعان.
زىمىران شابۋىلىن حاماس پەن "يسلام دجيحاد" راديكالدى توپتارى موينىنا الدى.
يزرايلدٸڭ قورعانىس ارميياسى پالەستينانىڭ جٷز شاقتى ەسكەري نىسانىن اتقىلادى. ولاردىڭ بٸر بٶلٸگٸ تۇرعىن ٷيلەرمەن قاتار ورنالاسقان. سەيسەنبٸ كٷنٸ كەشكە پالەستينالىق باق بٸرنەشە تۇرعىن ٷيدٸڭ قيراعانىن, ونداعان ادامنىڭ زارداپ شەككەنٸن حابارلادى. يزرايل تارابى تەك راديكالدى توپتار شوعىرلانعان نىسانداردى اتقىلاعانىن مەلٸمدەدٸ.
بٸرنەشە اراب وتباسى شىعىس يەرۋساليمنەن كٶشٸرٸلۋٸ مٷمكٸن دەگەن اقپارات تاراعاننان كەيٸن ايماقتا سوڭعى بٸرنەشە كٷندە جاعداي ۋشىققان. يزرايل سوتىنىڭ شەشٸمٸ پالەستينالىقتاردى نارازى ەتتٸ. 7 مامىردا كەشكە ولار پوليتسەيلەرگە تاس اتىپ, بٶتەلكە, ارماتۋرا لاقتىرعان.
قاقتىعىستى رەتتەۋ ٷشٸن پوليتسييا حرام تاۋىنا باراتىن جولداردى بەكٸتتٸ. پالەستينا اقپارات قۇرالدارىنىڭ حابارلاۋىنشا, يزرايلدٸكتەر رەزەڭكە وق اتىپ, قۇلاق تۇندىراتىن گراناتا قولدانعان. بٸراز ۋاقىتتان سوڭ پوليتسييا ەل-اقسا مەشٸتٸنە شتۋرممەن باسىپ كٸرٸپ, جۇرتتى كٷشپەن تاراتقان.
پالەستيندٸكتەردٸ كٶشٸرۋ تۋرالى سوت شەشٸمٸن قاراۋ كەيٸنگە قالعان, بٸراق قاقتىعىس جالعاسىپ جاتىر.
بۇۇ, ەۋرووداق پەن اقش تاراپتاردى سابىرعا شاقىردى.
