Foto: KTK
Áleýmettik jelide Amantai qajynyń egde jastaǵy áieldi baspaldaqtan iterip jibergeni túsirilgen video taraǵan bolatyn. «Amantai qajy anamdy baspaldaqtan iterip jiberdi» degen áiel oqiǵanyń qalai bolǵanyn baiandap berdi, dep habarlaidy KTK.
Raisa Besqaraǵaevanyń aitýynsha, Amantai qajy zeinet jasyndaǵy áielge ózdiginen soqtyqqan. Sonyń kesirinen áieldiń jambasy synyp, aýrýhanaǵa tósegine tańylypty.
«Artyna qarap turyp, Amantai qajy anamdy iterip jibergen. Ózinen-ózi iterip jibergen. Eshqandai urys-keris bul jerde bolǵan joq. Sap-saý júrgen anamdy múgedek qylyp, endi, mine, áli aýrýhanada jatyrmyz, qozǵala almaidy, ne júre almaidy. Jambas súiegi eki jerden synǵan. Sodan keiin eki jerden de temir salynǵan. Súiegi ydyrap, shashylyp ketken ǵoi», – deidi Raisa Besqaraǵaeva.
Oqiǵa osydan eki apta buryn tańǵy ýaqytta bolǵan. 76 jastaǵy Biǵaisha Bektenbaeva qaladaǵy stadiondardyń birinde medbike bolyp jumys isteidi eken. Sol kúni áiel Amantai qajymen amandasyp, oǵan ishke kirýge jol beripti. Biraq Amantai Asylbek ái-shai joq, zeinetkerdi iterip jibergen kórinedi.
Raisa Besqaraǵaevanyń aitýynsha, eń soraqysy, Amantai Hantemiruly munysynan keiin artyna burylyp ta qaramapty. Áiel kóp qan joǵaltyp, oǵan tórt saǵat boiy ota jasalǵan.
Politsiia bul jaǵdai boiynsha qylmystyq is qozǵady. Jábirlenýshi tarap oǵan ádil jaza suraidy ári búginge deiin ketken shyǵyndy ótep berýin talap etedi.
Aita keteiik, Amantai qajy el ishinde qoǵam belsendisi retinde tanymal. Ol iadrolyq synaqqa qarsy «Attan, Qazaqstan» qozǵalysyn basqarady. Osydan on jyl buryn ol ózin Prezident sailaýyna kanditatýrasyn usynǵan bolatyn.
