2020 jyl eshkimge ońai tigen joq. Jahandy jailaǵan pandemiia qanaty qataiyp úlgermegen jańa bastamalardy aitpaǵanda, burynnan kele jatqan jobalardy da tunshyqtyryp tastady. Biri óz jumysyna úzilis jasaýǵa májbúr bolsa, endi biri múldem jabylyp qaldy. Degenmen, barlyq synaqtan súrinbei ótip, óz jumystaryn túlendire bilgen otandyq jobalar da bar, dep habarlaidy "Ult aqparat".
Búgin «Ózgeristiń sárýarlary» akseleratsiialyq baǵdarlamasynan tolyq ótken 18 áleýmettik jobany arnaiy sertifikattarmen marapattady. Esterińizge sala keteiik, jyl basynda «Rýhani jańǵyrý» qazaqstandyq qoǵamdyq damý institýtynyń bazasynda «Ózgeristiń sárýarlary» áleýmettik jobalar baǵdarlamasy qolǵa alynǵan bolatyn. Baǵdarlamanyń maqsaty boiynsha, qoǵamdyq mańyzy zor aimaq kólemindegi jobalar elimizdiń ózge óńirlerine masshtabtalý úshin akseleratsiianyń tolyq baǵdarlamasynan ótken. Áý basta jobalar arasynda konkýrs uiymdastyrylyp, 120 ótinish tústi. Sonyń 46-sy ǵana iriktelip, akseleratsiianyń bastapqy kezeńine qatysqanymen finaldyq kezeńge 18-si ǵana ótti. Mine, «Rýhani jańǵyrý» QQDI bastaǵan «Ózgeristiń sárýarlary» baǵdarlamasynyń arqasynda bul jobalar akseleratsiianyń tolyq satysynan ótip, óz jumystaryn respýblikalyq kólemde masshtabtaýǵa múmkindik aldy.
«Joba úkimettik emes uiymdar arasynda úlken qyzyǵýshylyq týdyryp, «Ózgeristiń sárýarlary» baǵdarlamasyna qatysýǵa kóptegen ótinish tústi. Akseleratsiianyń nátijesinde biz «Rýhani jańǵyrý» baǵdarlamasynyń básekege qabilettilik, pragmatizm, bilimniń saltanat qurýy, sananyń ashyqtyǵy, evoliýtsiialyq damý jáne ulttyq biregeilikti saqtaý syndy barlyq baǵyttaryn boiyna sińirgen jáne jarqyn bolashaqqa umtylǵan jańa jobalardy kópshilikke tanystyrdyq. Endigi kezekte bul jobalardyń barlyǵy «Rýhani jańǵyrýdyń» brend-ambasadory jáne «Ózgeristiń elshileri» retinde ózge de áleýmettik bastamalarǵa úlgi bolady» , - dedi «Rýhani jańǵyrý» QQDI Basqarma Tóraǵasy Daniiar Esin.
«Ózgeristiń sarýarlary» baǵdarlamasynyń birinshi maýsymy máresine jetkenimen oǵan qatysqan jobalar ári qarai da «Rýhani jańǵyrý» institýty tarapynan qoldaý taba bermek. Máselen, kelesi jyly «Ózgeristiń sárýarlary» klýby qurylyp, áleýmettik bastamalar men jobalardy jańǵyrtý jáne damytý maqsatynda alqaqotan jiyndar ótkizetin ortaǵa ainalady. Sondai-aq, respýblikalyq kólemde Sarapshylar keńesi qurylyp, jobalardy óńirlerge taratý úshin effektivti jumystar júrgiziledi. Budan bólek, «Rýhani jańǵyrý» ortalyǵynyń jetekshisi Janar Boqanovanyń aitýynsha, iri megapolister men oblys ákimderin akseleratsiiadan ótken 18 jobaǵa qoldaý kórsetýge shaqyrmaq.
Óz kezeginde Akselerator sarapshysy, «Trint» qoǵamdyq qorynyń direktory Iýliia Natarova akseleratsiiaǵa qatysqan jobalardyń barlyǵy jumystaryn respýblikalyq kólemde damytýǵa áleýetti ekendigin aitty.
«Áý basta irikteý jasaǵanda da respýblikalyq kólemde damýǵa múmkindikteri mol jobalar qarastyryldy. Biraq olarǵa kishkene qoldaý kórsetip jiberý kerek boldy. Nátijesinde qazir olar aimaqtarǵa óz franshizalaryn usynyp, óńirlerde filialdaryn asha alatyn jaǵdaiǵa jetti», - dedi Iýliia Natarova.
Jiyn sońynda akseleratsiianyń tolyq baǵdarlamasynan ótken barlyq jobalarǵa arnaiy sertifikattar tabystaldy.
.jpeg)