Oilanyp jatyrmyn. Osydan bir jyl buryn ómirimiz qandai edi?! Jaibaraqat edik. Ýaiymsyz edik. Úreisiz edik. Ómir bolǵasyn qiyndyq ta bolatyn, basqa da bolatyn. Biraq, qai másele bolsyn áiteýir sheshiletin. Bireýden tumaý juqsa, piiazdy qarshyldatyp jep, tamaq aýyrsa tuzben shaia salyp, erteńgi kúnniń tirshiligine alqyn-julqyn kirisip ketýshi edik. Búgin qatty ózgerdik. Syrtymyz sol qalpy bolǵanmen, jannyń hálin ainytpai kórsetip turatyn janarymyz ózgerdi.
Qarashyǵymyzda diril paida boldy. Júrektiń qaǵysy ózgerdi, arman-murattarymyzdyń mazmuny da basqa keiipke endi. Biz ólimniń aqiqat ekenin bilip shoshyndyq. Jaqynnyń qadirin bildik. Ómir degen - jińishke jip sekildi úzile salatyn sondai názik qubylys ekenin túsindik. Baiaǵy bir keremet mańyzdy bop kóringen máselelerimiz túkke turmaityn nárse ekenin, talasyp júrgenimiz boqqa turmaityn dúnie ekendigin uǵyndyq. Ózgerdik. Adam tanymastai ózgerdik. Ony bárimiz de sezip-bilip júrmiz. Biraq, eshkimge aitpaimyz. Óitkeni biz bireýge jan muńyn aitýdan, syrlasýdan baiaǵyda qalǵanbyz. Sebebi, «abyroisyz» bop qalýdan qorqatyn boldyq. Ósekten, tarap ketetin qazaqtyń «uzyn sózinen» aýlaq bolǵymyz keledi. Nemese bári saý, al meniń esim aýǵan ba dep oilaimyz. Ony bireýden suraýdan da qashamyz. Eshkimge senbeimiz. Qańqý sóz, bireý týraly taraǵan «áshkere jańalyqqa» tez senemiz. Menimen emes, ol jaǵdai «anaý ońbaǵanmen» bolyp jatqanyna qýanamyz. Eger júregimiz qatyp qalmaǵanda, myna indet kezinde biz múmkin bir birimizge tirek bola alatyn ba edik. Meiirimmen bul dertti eritip jiberer me edik. Joq, biz árqaisymyz myna álemniń aldynda jeke-jeke qaldyq. Jalǵyzbyz bárimiz. Ómirdiń aldynda da, ólimniń aldynda da qaltyrap, jalǵyzdan jalǵyz turmyz.
Degenmen ózgerdik. Sebebi ishimizge úrei shoǵy túsip, janymyzben qosyp arymyzdy da shyjǵyryp jatyr. Ishimizge túsken senimsizdik bizdiń qandai álsiz ekenimizdi, ótirik qoqilanyp júretinimizdi óz ózimizge áshkerelep bere saldy. Bizdiń qandai álsiz jaratyndy ekenimizdi tozańdai ǵana virýs kórsetip berdi. «Jaǵajaidaǵy Kafka» kitabynda Harýki Mýrakamidiń aitatyny bar ǵoi: «Kúnderdiń kúninde daýyl tynshidy, al sen sol daýyldyń soiqanyna qalai shydaǵanyńdy da umytyp ketesiń. Sen tipti onyń bitken-bitpegenin de sezbeýiń múmkin. Biraq bir dúnie anyq: sen ol daýyldan shyqqanda endi eshqashan burynǵy adam bolmaisyń. Daýyldyń mán-mańyzy da sonda» deidi.
Biz búgin burynǵy emes, ózgemiz. Jaqsy jaǵyna ózgerdik degen álsiz senim bar. Úrei men úmit qos qol sekildi júregimizdi umajdap-umajdap endigi jumsartqan da shyǵar? Múmkin.
Aqberen Elgezek
