Qazirgi jaǵdaida barshamyz bir-birimizge óte sabyrly, bir-birimizdi jaralap almai, barynsha janashyrlyqpen sóileýge, baýyrmaldyqpen qaraýǵa tiispiz. Ońai emes, árine. Emotsiialarymyz burq-sarq qainap, janartaýdai atqylap-aq tur. Biraq, biz bir ulttyń, bir memlekettiń adamdarymyz, tarihymyz ben taǵdyrymyz ortaq, ortaq babalarymyzdyń urpaǵymyz, bolashaǵymyz da ortaq. Sondyqtan árqaisymyz bir-birimizdiń qadirimizge jetýimiz kerek.
Soǵys jaǵdaiynda qas elder odaqtasyp, araz adamdar dostasyp, ortaq jaýǵa birge shabady. Birneshe kún biz sondai soǵys jaǵdaiynda bolǵanymyz ras. Endi beti aýlaq! Bul - bizge Táńir dárgeiinen úlken eskertý.
Bilik basyndaǵy adamdar tym astamsyp ketti, memleketti jemqorlyq atty ajdaha býyp tastady, ózimizge emes, ózge elderge aqyl aityp, qoramyzdaǵy byqyp-shylqyp jatqan tezek-qiǵa qaramai, shalqaqtap, pań júrdik. Halyqty nadan, sanasyz qara buqara dep eseptedik. “Osylarǵa ne jetpeidi osy!” dep tegis jarylqap tastaǵandai aspannan mensinbei qaradyq. “Istidraj” bitti. Ne ekseń, sony orǵyzatyn zaýal keldi. Esti jiiatyn, etek jinaityn ýaqyt jetti. Kúntizbede 21 ǵasyr. Budan bylai “urpaǵymyzdan jalǵa alǵan” (amerika úndisteriniń máteli) jerde jumaq ornatyp tastamasaq ta, tym quryǵanda ádilet pen gýmanizm dánin egip ketýge tyrysaiyq.
Biz jańa elde, tútin (2022 jyldyń qańtar oqiǵalary - redaktsiia) torlap tursa da, jańa dáýirdiń bozǵylt tańynda oiandyq. Einshteinnyń “bir ret ózgergen sana endi qaityp burynǵy qalpyna oralmaidy” degenge saiatyn sózi bar-tuǵyn. Sanamyz silkingeni ras, paradigmamyz ózgergeni ras, endi soǵan sai qarym-qatynas ornaý kerek. Memlekettiń - qoǵamǵa, qoǵamnyń - memleketke, qazaqtyń - qazaqqa, qazaqtyń - ózge ulttarǵa, Qazaqstannyń óz Táýelsizdigine degen qarym-qatynasy. Qazaqtyń Qudaiǵa degen qarym-qatynasy, ár qazaqtyń jalpyadamzattyq adamgershilik qundylyqtaryna degen umtylysy, parasatty kózqarasy ózgerýi kerek.
Jyly-jyly sóileseń, jylan ininen shyǵa bermeitin kezder de bolady, al, qalaýyn tapsań, qar janatyn qubylystar qashanda óz erkimizde, óz tańdaýymyzda. Burynǵydai basty tómen salbyratyp, ilbip qana júre bersek, onsyz da shańyn ǵana jutyp kele jatqan álemdik kósh eshqashan qarasyn da kórsetpeidi. Jastarymyz arzan da ońai paidaǵa emes, bilim men ǵylymǵa, ozyq ideialarǵa áýes bolsa igi.
Eshkim eshkimnen artyq emes, eshkim eshkimnen kem emes. Ortaq mekenimizdiń, ortaq Otanymyzdyń bolashaǵy úshin qýana jumys istesek, biz almaityn asý joq. Qazir bizge Jaratqan úlken shans berip tur. Muny Prezidentten bastap, qoǵamnyń ár múshesi tolyq túisinip, berik túsinse deimiz.
Aqberen Elgezek, aqyn,
Qazaqstan Jazýshylar odaǵy basqarma Tóraǵasynyń Birinshi orynbasary
