قازٸرگٸ جاعدايدا بارشامىز بٸر-بٸرٸمٸزگە ٶتە سابىرلى, بٸر-بٸرٸمٸزدٸ جارالاپ الماي, بارىنشا جاناشىرلىقپەن سٶيلەۋگە, باۋىرمالدىقپەن قاراۋعا تيٸسپٸز. وڭاي ەمەس, ەرينە. ەموتسييالارىمىز بۇرق-سارق قايناپ, جانارتاۋداي اتقىلاپ-اق تۇر. بٸراق, بٸز بٸر ۇلتتىڭ, بٸر مەملەكەتتٸڭ ادامدارىمىز, تاريحىمىز بەن تاعدىرىمىز ورتاق, ورتاق بابالارىمىزدىڭ ۇرپاعىمىز, بولاشاعىمىز دا ورتاق. سوندىقتان ەرقايسىمىز بٸر-بٸرٸمٸزدٸڭ قادٸرٸمٸزگە جەتۋٸمٸز كەرەك.
سوعىس جاعدايىندا قاس ەلدەر وداقتاسىپ, اراز ادامدار دوستاسىپ, ورتاق جاۋعا بٸرگە شابادى. بٸرنەشە كٷن بٸز سونداي سوعىس جاعدايىندا بولعانىمىز راس. ەندٸ بەتٸ اۋلاق! بۇل - بٸزگە تەڭٸر دەرگەيٸنەن ٷلكەن ەسكەرتۋ.
بيلٸك باسىنداعى ادامدار تىم استامسىپ كەتتٸ, مەملەكەتتٸ جەمقورلىق اتتى اجداھا بۋىپ تاستادى, ٶزٸمٸزگە ەمەس, ٶزگە ەلدەرگە اقىل ايتىپ, قورامىزداعى بىقىپ-شىلقىپ جاتقان تەزەك-قيعا قاراماي, شالقاقتاپ, پاڭ جٷردٸك. حالىقتى نادان, ساناسىز قارا بۇقارا دەپ ەسەپتەدٸك. “وسىلارعا نە جەتپەيدٸ وسى!” دەپ تەگٸس جارىلقاپ تاستاعانداي اسپاننان مەنسٸنبەي قارادىق. “يستيدراج” بٸتتٸ. نە ەكسەڭ, سونى ورعىزاتىن زاۋال كەلدٸ. ەستٸ جيياتىن, ەتەك جينايتىن ۋاقىت جەتتٸ. كٷنتٸزبەدە 21 عاسىر. بۇدان بىلاي “ۇرپاعىمىزدان جالعا العان” (امەريكا ٷندٸستەرٸنٸڭ مەتەلٸ) جەردە جۇماق ورناتىپ تاستاماساق تا, تىم قۇرىعاندا ەدٸلەت پەن گۋمانيزم دەنٸن ەگٸپ كەتۋگە تىرىسايىق.
بٸز جاڭا ەلدە, تٷتٸن (2022 جىلدىڭ قاڭتار وقيعالارى - رەداكتسييا) تورلاپ تۇرسا دا, جاڭا دەۋٸردٸڭ بوزعىلت تاڭىندا وياندىق. ەينشتەيننىڭ “بٸر رەت ٶزگەرگەن سانا ەندٸ قايتىپ بۇرىنعى قالپىنا ورالمايدى” دەگەنگە ساياتىن سٶزٸ بار-تۇعىن. سانامىز سٸلكٸنگەنٸ راس, پاراديگمامىز ٶزگەرگەنٸ راس, ەندٸ سوعان ساي قارىم-قاتىناس ورناۋ كەرەك. مەملەكەتتٸڭ - قوعامعا, قوعامنىڭ - مەملەكەتكە, قازاقتىڭ - قازاققا, قازاقتىڭ - ٶزگە ۇلتتارعا, قازاقستاننىڭ ٶز تەۋەلسٸزدٸگٸنە دەگەن قارىم-قاتىناسى. قازاقتىڭ قۇدايعا دەگەن قارىم-قاتىناسى, ەر قازاقتىڭ جالپىادامزاتتىق ادامگەرشٸلٸك قۇندىلىقتارىنا دەگەن ۇمتىلىسى, پاراساتتى كٶزقاراسى ٶزگەرۋٸ كەرەك.
جىلى-جىلى سٶيلەسەڭ, جىلان ٸنٸنەن شىعا بەرمەيتٸن كەزدەر دە بولادى, ال, قالاۋىن تاپساڭ, قار جاناتىن قۇبىلىستار قاشاندا ٶز ەركٸمٸزدە, ٶز تاڭداۋىمىزدا. بۇرىنعىداي باستى تٶمەن سالبىراتىپ, ٸلبٸپ قانا جٷرە بەرسەك, ونسىز دا شاڭىن عانا جۇتىپ كەلە جاتقان ەلەمدٸك كٶش ەشقاشان قاراسىن دا كٶرسەتپەيدٸ. جاستارىمىز ارزان دا وڭاي پايداعا ەمەس, بٸلٸم مەن عىلىمعا, وزىق يدەيالارعا ەۋەس بولسا يگٸ.
ەشكٸم ەشكٸمنەن ارتىق ەمەس, ەشكٸم ەشكٸمنەن كەم ەمەس. ورتاق مەكەنٸمٸزدٸڭ, ورتاق وتانىمىزدىڭ بولاشاعى ٷشٸن قۋانا جۇمىس ٸستەسەك, بٸز المايتىن اسۋ جوق. قازٸر بٸزگە جاراتقان ٷلكەن شانس بەرٸپ تۇر. مۇنى پرەزيدەنتتەن باستاپ, قوعامنىڭ ەر مٷشەسٸ تولىق تٷيسٸنٸپ, بەرٸك تٷسٸنسە دەيمٸز.
اقبەرەن ەلگەزەك, اقىن,
قازاقستان جازۋشىلار وداعى باسقارما تٶراعاسىنىڭ بٸرٸنشٸ ورىنباسارى
