Reseidiń kópirler men energetikalyq infraqurylymǵa soqqylary kúsheigendikten, Kiev qysqa merzimde qiyn jaǵdaiǵa tap bolýy múmkin. Osyǵan bailanysty qala ákimi Vitalii Klichko týystary nemese tanystary qaladan tys jerde turatyn turǵyndarǵa qysta ýaqytsha kóship ketý múmkindigin qarastyrýǵa keńes berdi, dep habarlaidy ult.kz France24 basylymyna silteme jasap.
Klichkonyń aitýynsha, Reseidiń Kievke shabýyly kúsheiip, qaladaǵy jaǵdai qiyndap barady. Sondyqtan bilik aldaǵy qysqa daiyndyqty kúsheitip, turǵyndardyń qaýipsizdigin qamtamasyz etýge basymdyq berip otyr.
«Kún saiyn qiraǵan ǵimarattar, jaralanǵandar men qaza tapqandar týraly jańa habarlar túsip jatyr. Qalamyzǵa jasalǵan shabýyldar kúsheiip keledi. Qazir basty másele – aman qalý», – dedi Kiev ákimi.
Sonymen birge Klichko turǵyndardy qaladan jappai ketýge shaqyrmaitynyn atap ótti. Onyń sózinshe, Reseidiń kózdegeni – adamdardyń qalany tastap, bos qalalardy jaýǵa qaldyrýy.
Qysta jaǵdai qiyndaýy múmkin
Qala ákimi sý júiesine soqqy jasalǵan jaǵdaida Kievte aýqymdy daǵdarys týyndaýy múmkin ekenin eskertti. Sondai-aq áýe shabýylyna qarsy qorǵanys júiesi durys jumys istemese, elordadaǵy jaǵdai odan ári qiyndaýy yqtimal.
Qazir qala biligi qysqa daiyndyq aiasynda qosymsha jylý júielerin salyp, janarmai, azyq-túlik pen aýyzsý qoryn jinap jatyr.
Budan bólek, Reseidiń Dnepr ózeni arqyly ótetin kópirlerge soqqy jasaýy kólik qatynasyna qaýip tóndirgen. Klichkonyń aitýynsha, ózenniń sol jáne oń jaǵalaýyn bailanystyrý – qalanyń qalypty jumys isteýi úshin mańyzdy. Osyǵan bailanysty bilik ózennen ótýdiń balama joldaryn, sonyń ishinde ponton kópirlerin ornatý múmkindigin qarastyryp jatyr.
Kiev ákimi buǵan deiin de jylý tapshylyǵyna bailanysty turǵyndarǵa múmkindik bolsa, qala syrtyndaǵy jerlerge ýaqytsha kóshýdi usynǵan edi. Ol mundai eskertýlerdi halyqty yqtimal qiyndyqtarǵa aldyn ala daiyndaý úshin jasap otyrǵanyn aitty.
