Elimizdiń qarýly kúshterinde ózge radikaldy dini baǵyttardyń áserine ilikken sarbazdar joq. Bul týraly QR Qorǵanys ministri, general-polkovnik Sáken Jasuzaqov Májilistiń QR Qarýly kúshteriniń qyzmetine arnalǵan Úkimet saǵatynda aitty, dep habarlaidy "Ult aqparat" Baq.kz portalyna silteme jasap.
Májilis depýtaty Saýytbek Ábdirahmanov Qorǵanys ministrine «Prezident otanshyldyq tárbieniń áskerge tikelei qatysy bar ekendigin aitqan bolatyn. Sonyń ishinde bir ǵana qyryn aitatyn bolsaq, ol - áskerge shaqyrylǵan jastardyń arasynda ózge radikaldy dini baǵyttardyń áserine ilikken jastardyń bolatyndyǵy. Olar armiiada atymen joq dep árine aita almaisyz. Olardyń saqalyn qyryp, áskerdiń uzyn shalbaryn kigizýmen is bitpeitini belgili. Ásker qatarynda, armiiada sondai jastarmen qandai jumys júrgiziledi?» degen suraq qoidy.
«Bizdiń qarýly kúshterimizde elimizdiń azamattary óziniń áskeri boryshyn ótep jatyr. Olar «voenkomattarǵa» shaqyrylǵannan bastap, kelisimshart boiynsha qyzmet, basqa da qyzmet bolsyn, eń birinshi bizdiń psihologtyń aldynan ótedi. Olar mamannyń suraqtaryna jaýap beredi. Psihologtyń bir suraǵy dinge bailanysty. Sonyń bárin qarap shyqqannan keiin ǵana áskerge shaqyramyz. Áskerge kelgennen keiin batalonnan bastap bizdiń árbir quramada psihologtar bar. Olar da áskeri boryshyn óteýge kelgen soldattar men serjanttardy qaraidy. Ekinshiden, brigadada ideologiia jáne arnaiy nasihat jaǵynan jumys isteitin ofitser bolady. Ol da barlyǵyn tekserýden ótkizip, komandirge baiandama jasaidy. Komandir ózi qarap, qajetti jumystardy qolǵa alady. Merzim bitkennen keiin áskerden ketken sarbazdardyń barǵan jerlerine biz málimet beremiz. Biz qazir kóp jumysty IIM jáne UQQ-men birigip isteimiz. Barlyǵyn tekserip, qaýpi barlarmen arnaiy jumys júrgiziledi. Desek te, qazirgi tańda qarýly kúshterde qaýip tóndiretin sarbazdar joq», - dedi Jasuzaqov.
Atap ótsek, biyl Qazaqstan Respýblikasynyń Qarýly kúshterine 25 jyl.
