Ózge eldermen salystyrǵanda, qazaqstandyqtarǵa eńbekaqy tóleýdiń úlesi tómen. Bul jaiynda Májilis depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
Jalaqy tóleýdegi sáikessizdikti eńbek naryǵyna júrgizilgen saraptama kórsetken.
«2021 jyly jalpy ishki ónim qurylymynda ózge eldermen (Reseide – 46,7, Belarýsta – 49,7, Eýropalyq odaqta 47,9 paiyz) salystyrǵanda jumysshylarǵa eńbekaqy tóleýdiń tómen úlesi baiqalady – 30,9 paiyz. Bul eńbekaqy tóleýdegi sáikessizdikke, jasyryn jumyssyzdyqtyń bolýyna jáne sonyń saldarynan jumys isteitin kedeilerdiń (Qazaqstanda - 32,7, Ázerbaijanda – 39,7, Reseide - 30,7, Grekiiada – 13,4 paiyz) artýyna negizdeledi», - delingen Úkimet basshysynyń jaýabynda.
Onyń atap ótýinshe, saraptamalyq jumystardy júrgizýge jáne onyń qorytyndylaryn talqylaýǵa «Ekonomikalyq zertteýler institýty» AQ, «Atameken» UKP sarapshylary, ekonomika salasyndaǵy táýelsiz sarapshylar qatysqan.
«Saraptamalyq jumystyń qorytyndysy múddeli taraptardyń, sondai-aq Parlament depýtattarynyń qatysýymen 2025 jylǵa deiin halyqtyń tabysyn arttyrý baǵdarlamasyn ázirleý jónindegi turaqty jinalystarda birneshe márte talqylandy», - deidi Álihan Smaiylov.
