Foto: ozen.kz
Mańǵystaý oblysy Ekonomikalyq tergep-tekserý departamenti "ÓzenMunaiGaz" AQ bas direktorynyń orynbasary Baýyrjan Mambetsapaevty laýazymdy ókilettikterin teris paidalandy jáne osy áreketi aýyr saldarǵa alyp keldi degen kúdikpen ustady, - dep habarlaidy "Ult aqparat" vedomstvonyń baspasóz qyzmetine silteme jasap.
Departament málimetinshe, Baýyrjan Mambetsapaev laýazymdy mártebesin paidalanyp, jumysqa qabyldaý týraly bekitilgen qaǵidalardy óreskel buzyp, óziniń birqatar tanysyn "Ózen Munai Gaz" AQ-na zańsyz kirgizgen. Degenmen kompaniiaǵa jumysqa kirý úshin Jańaózen qalasynyń 9 myńnan asa turǵyny kezekke tirkelgen.
"Tanystarynyń jumyssyzdar qatarynda bolmaǵandaryn, tiisti mamandyqqa biliktilikteri sáikes kelmeitinin jáne jumysqa múldem kelmegenderin Mambetsapaevtyń anyq bilgeni tergeýde anyqtaldy.
Baýyrjan Mambetsapaevtyń zańsyz is-áreketteri saldarynan memleketke 46 million teńgeden asa zalal keltirilip, Jańaózen qalasy turǵyndarynyń kompaniiaǵa ornalasýdaǵy quqyqtary óreskel buzylýyna ákep soqqan", - delingen habarlamada.
Tergeýmen Mambetsapaevtyń basqa da zańsyz áreketteri, kompaniianyń, laýazymdy tulǵalardyń jáne merdiger mekemelerdiń biýdjet qarajattaryn jymqyrý derekteri tekserilip jatyr.
Tergeý jalǵasyp jatyr. Qylmystyq protsestik kodekstiń 201-babyna sáikes ózge de málimetter tergeý múddesinde jariialanýǵa jatpaidy.
