Jańa prezident memlekettik qyzmetkerlerden "tyń oilar", qyzmetine degen jaýapkershilik, bastamashyldyq jáne halyq aldynda adal bolýyn kútedi.
Ózbekstannyń jaqynda sailanǵan prezidenti Shavkat Mirziioev aitqandai, memlekettik qurylymda kúrdeli reformalar júrgiziledi, onyń ishinde memlekettik qyzmettegi "artyq" laýazymdar qysqartylyp, mindettilikterin ótkermegeni úshin qylmystyq jaýapkershilikke tartý engizilýi múmkin, dep jazady Sputnik Ózbekstan.
"Biz prezident apparaty men ministrler kabineti apparatynyń qyzmetin jetildirýge, qabyldanatyn zańdar, qaýlylar men jarlyqtardyń tiimdi júzege asyrylýyn qamtamasyz etýge kóp kóńil bólemiz", — dep atap ótti Ózbekstannyń jańa basshysy.
Sailanǵan prezidenttiń taǵy bir málimdemesi mindetterin durys atqarmaǵan sheneýnikterdi qylmystyq jaýapkershilikke tartý týraly usynysy bolyp tabylady.
Mirziioevtiń sózine júginsek, 25 qyrkúiek kúni ǵalamtorda premer-ministrdiń virtýaldy qabyldaý bólmesi ashyldy. Osy ýaqyt aralyǵynda virtýaldy qabyldaýǵa 218 myńnan astam ótinish kelip túsken. Olardyń 59% —nyń sheshimi tabyldy, al 41%-y áli qaralýda. Bul ótinishterdi saraptaý arqyly azamattar ómirinde kúrdeli máseleler boiynsha kóp nárse belgili bolǵan eken.
"Sanamyzda bir suraq týyndaidy: bilik organdary men vedomstvolar, tiisti basshylar bul máselelerdi ýaqytyly sheshpei qaida qarap júr? Elimizde "Jeke jáne zańdy tulǵalardyń ótinishteri týraly" bólek zań bar emes pe?! Alaida, ókinishke orai, zańnyń júzege asyrylýyna mán berip júrgen eshkim joq", — dep oiyn qorytty Shavkat Mirziioev.
Sol sebepti, prezidenttiń paiymdaýynsha, osy zań talaptaryn oryndamaǵan basshylar men laýazymdy tulǵalardy ákimshilik qana emes, qylmystyq jaýapkershilikke tartý qajet.
Ult portaly
