Ózbekstannan Dostyq kanaly arqyly Qazaqstanǵa sekýndyna 80 tekshe metr sý kelýde. Bul týraly QR ekologiia, geologiia jáne tabiǵi resýrstar vitse-ministri Serik Qojaniiazov Túrkistan oblysyna is-saparynda aitty.
Bul Qazaqstan men Ózbekstan transshekaralyq ózender boiynsha nátejieli kelisimge qol jetkizýiniń arqasy, deidi ministr orynbasary. Bul sýarmaly sý tapshylyǵy ýaqytynda vegetatsiia kezeńi qalypty jaǵdaida ekenin kórsetedi.
Sonymen qatar, Serik Qojaniiazov Túrkistan oblysy Jetisai aýdanynda jergilikti dihanshylar jáne aýdan ákimderimen beinekonferentsiia arqyly jiyn ótkizdi. Onda Jetisai jáne Maqtaaral aýdandarynyń aǵyn sý máselesi kóterildi. Jetisai aýdanynyń ákimi Murat Qydyrbek «Dostyq» magistraldyq kanalynan jazǵy vegetatsiialyq sýarý kezinde túrli sebeptermen aýdanǵa qajetti sý kólemi jetpei qalatynyn tilge tiek etti. Sol sebepten aýdan ákimi vitse-ministrden Shardara sý qoimasynan mashinalyq ádispen sý kóterý arqyly qosymsha aǵyn sý alý úshin kanaldy qajettilikke qarai qosýdy surady.
«Sýarmaly jerlerdi tiimdi paidalaný máselesinde sheshilýi tiis ózekti máseleler Jetisai aýdanynda da az emes. Aýdandaǵy 80 myń gektar sýarmaly egistik jerde 10 myńǵa jýyq agroqurylym jumys istep jatyr. Aýyl sharýashylyǵy salasynda eńbek etetin 40 myńǵa jýyq turǵynnyń kúnkórisi osy aýylsharýashylyq daqyldarynan alynǵan ónim kólemine bailanysty. Jyl saiyn memleketaralyq «Dostyq» magistraldyq kanalynan jazǵy vegetatsiialyq sýarý kezinde túrli sebeptermen aýdanǵa qajetti sý kólemi kelmei qalý jaǵdailary tirkeledi. «Dostyq» magistraldyq kanaly arqyly keletin aǵyn sý jetkiliksiz bolǵan jaǵdaida Shardara sý qoimasynan mashinalyq ádispen sý kóterý arqyly qosymsha aǵyn sý alý úshin mashinalyq kanaldy qosýdy suraimyn», - dedi Jetisai aýdanynyń ákimi Murat Qydyrbek.
Alaida Serik Qojaniiazov Syrdariia ózeni arqyly toltyrylatyn «Shardara» sý qoimasynyń negizgi qyzmeti Túrkistan jáne Qyzylorda oblystaryn aǵyn sýmen ýaqytyly qamtamasyz etý ekendigin aitty. Bul rette atalǵan eki aýdanǵa da aǵyn sýdy jetkilikti paidalaný kerektigin eskertti. Degenmen kóterilgen usynys atalǵan kanalda sý tapshylyǵy bolǵan jaǵdaida sý bólý júiesine sáikes qabyldanatynyn málimdedi.
«Biz qazir sýdyń az tsiklyndamyz. Sol sebepten osy eki aýdanǵa da jetkilikti mólsherde aǵyn sýdyń berilýin qamtamasyz etý úshin tiimdi ári únemdi paidalanýymyz qajet. Dostyq magistraldy kanalynda aǵyn sý jetispeýshiligi bolǵan jaǵdaida «Mashinalyq ádispen sý kóterý» kanalyn qosý týraly sheshimdi aldaǵy kúnderi retteý, bólý júiesine sáikes qabyldaityn bolamyz» - dedi vitse-ministr.
Budan bólek jiynda vitse-ministr irrigatsiialyq júieni jáne sýarmaly jerlerdi qalpyna keltirý boiynsha atqarylǵan jumystar týraly habarlady. Máselen, qazirgi ýaqytta Qyrǵyzstanyń Toqtoǵul sý qoimasynan Syrdariia ózeniniń arnasyna maýsym-tamyz ailarynda 330 mln.m3 sý kóleminde qosymsha sý jiberý týraly ýaǵdalastyqqa qol jetkizilgen. Osy kólemdegi sý Ózbekstan aýmaǵy arqyly kedergisiz tranziti týraly kelisimniń baryn airyqsha atap ótti.
