Ózbekstanmen transshekaralyq sý obektilerin birlesip basqarý kelisim jobasy mátininiń 80 paiyzy kelisildi.
Bul týraly Májilis depýtatynyń resmi saýalyna berilgen QR Premer-Ministr Asqar Maminniń jaýabynda aitylǵan, dep habarlaidy "Ult aqparat".
«Memleketaralyq kózderdiń sý resýrstaryn paidalaný men qorǵaýdy birlesip basqarý salasyndaǵy yntymaqtastyq týraly» 1992 jylǵy 18 aqpandaǵy Qazaqstan Respýblikasy, Qyrǵyz Respýblikasy, Ózbekstan Respýblikasy, Tájikstan Respýblikasy jáne Túrikmenstan arasyndaǵy kelisim Amýdariia jáne Syrdariia ózenderi basseininiń shektes memleketterimen sý salasyndaǵy yntymaqtastyq jónindegi negizgi qujat bolyp tabylady. Osy Kelisimniń erejesine sáikes árbir tarap óz aýmaǵynda basqa taraptardyń múddelerin qozǵaityn jáne olarǵa zalal keltirýge, sý shyǵystarynyń kelisilgen shamalaryn ózgertýge jáne sý kózderiniń lastanýyna ákep soǵatyn is-áreketterge jol bermeýge, sondai-aq sý resýrstaryn paidalaný jáne qorǵaýdyń kelisilgen tártibi men belgilengen qaǵidalaryn qatań saqtaýǵa mindettenedi», - dedi Premer-Ministr.
Asqar Maminniń atap ótýinshe, tótenshe jaǵdailar josparynda Qazaqstan úshin qaýipsizdiktiń barynsha yqtimal qateri Ózbekstan Respýblikasynan týyndaitynyn eskere otyryp, taraptar Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy transshekaralyq sý obektilerin birlesip basqarý, paidalaný jáne qorǵaý týraly kelisim jobasyn (budan ári – Kelisim jobasy) ázirleý jáne oǵan qol qoiý týraly ýaǵdalastyqqa qol jetkizgen.
«Qazirgi ýaqytta pysyqtaý barysynda ózbek tarapymen kelisim jobasy mátininiń 80 paiyzy kelisildi. Kelisim jobasyna qol qoiý jónindegi is-shara Jol kartasynda kórsetilgen. Budan basqa tabiǵi jáne tehnogendik sipattaǵy transshekaralyq tótenshe jaǵdailardyń týyndaýyna jol bermeý, tótenshe jaǵdailardy joiý boiynsha tiisti sharalardy jedel qabyldaý maqsatynda diplomatiialyq arnalar arqyly Ózbekstan Respýblikasynyń Tótenshe jaǵdailar ministrligine memleketterimizdiń shekaralas oblystarynyń tótenshe qyzmetteriniń ózara isqimyl jasaý qajettiligi týraly hat joldandy», - dedi Úkimet basshysy.
