1 jeltoqsannan bastap Qazaqstan men Ózbekstannyń shekarasynda ornalasqan "Qaplanbek" ótkizý beketi jabylady. Nysanda kúrdeli jóndeý jumystary jasalyp, jańa qural-jabdyqtar ornatylady. Bul týraly memlekettik kirister komiteti tóraǵasynyń orynbasary Baqytjan Sliamov málimdedi, dep habarlaidy Sputnik Qazaqstan.
Búginde shekaradaǵy 9 avtomobil jáne 1 temirjol ótkizý beketinde jańǵyrtý jumystary júrgizilip jatyr. Sonyń biri - "Qaplanbek" beketi. Árbireýine, shamamen, 15 mlrd teńge jumsalady. Jartysy qural-jabdyqtarǵa, qalǵany qurylys jumystaryna ketedi.
Memlekettik kirister komiteti tóraǵasynyń orynbasary Baqytjan Sliamovtyń aitýynsha, bir ótkizý beketin tolyǵymen jańǵyrtýǵa 19 ai ketedi. Barlyq jumystar 2024 jylda aiaqtalady degen jospar bar.
"Biz 1 jeltoqsannan bastap "Qaplanbek" ótkizý beketin jabýdy josparlap otyrmyz. Ol jerde tolyǵymen jańǵyrtý jumystary atqarylady. Barlyq mekemege tiisti hattar jiberildi. Kólik júrgizýshilerin de habardar etip, Qazyǵurt, Atameken jáne Qonysbaev siiaqty beketter arqyly ótýge keńes berip jatyrmyz", - dedi Sliamov ortalyq kommýnikatsiialar qyzmetinde ótken brifingte.
Onyń sózine qaraǵanda, buǵan deiin shekaradaǵy ótkizý beketinen ótý úshin kólik júrgizýshi bárine kirip shyǵýǵa mindetti. Aldymen shekaradaǵy baqylaýdan ótedi. Odan keiin kedendik tekseris bar.
Barlyǵyna kirip, belgi qoidyrtý qajet. Al beketti tolyǵymen jańartqannan keiin kólik tekseristen toqtamai ótedi. Kólik júrgizýshisi kabinadan shyqpaidy.
