21 qazanda Ózbekstannyń ońtústigindegi Qashqadariia oblysynyń Gýzar aýdanynda Uzbekistan GTL zaýytyn salyp jatqan myńdaǵan jumysshy búlik shyǵardy.
Azattyqtyń Ózbek qyzmetiniń qolyna túsken viedoda 5 myńǵa jýyq jumysshynyń zaýyt ǵimaratyna kúshpen basyp kirgeni baiqalady. Videotaspadan jihazdar men kompiýterlerdiń qirap jatqany kórinedi.
Oqiǵa ornyndaǵy kei jumysshylar Azattyqqa búlikti basý úshin Gýzor aýdanyna ulttyq ulan men politsiia kelgenin aitty.
Ázirge japa shekkender týraly málimet túsken joq.
Aty-jónin atamaýdy suraǵan jumysshylardyń biri Azattyq tilshisine oqiǵanyń sebebin aityp berdi. Onyń sózinshe, 20 qazanda jumys berýshi Enter Engineering kompaniiasy jumysshylarǵa keshki as bermegen. Bul onsyz da jalaqysyn almai júrgen jumysshylardy ashýlandyrǵan.
Tashkentte ornalasqan kompaniianyń resmi ókili Azattyqqa oqiǵanyń sebebin túsindirdi. Onyń aitýynsha, ashananyń elektrondy qulyptaý júiesi istemei qalǵandyqtan, jumysshylar esikti asha almai, sodan búlik shyǵarǵan.
Ózbekstan bas prokýratýrasynyń baspasóz hatshysy Haiot Shamsýtdinov oqiǵanyń jai-japsary anyqtalyp jatyr dedi.
GTL zaýyty – aimaqtaǵy sintetikalyq suiyq otyn óndirýge baǵyttalǵan eń innovatsiialyq jobalardyń biri.
