Ózbekstanda lak-boiaý ónimderi tielgen júk kóligi eńiske túsip kele jatqanda jyldamdyǵy artyp, aýdarylyp, jarylyp ketti. Jartylai tirkemedegi ónimder asfaltqa tógilip, órtenip ketti, - dep habarlaidy Tengrinews.kz saity Ózbekstannyń Tótenshe jaǵdailar ministrligine silteme jasap.
Ministrlik málimetinshe, oqiǵa 6 sáýirde kúndiz Tashkent-Osh halyqaralyq tasjolynyń 259-shaqyrymynda, Kamchik asýynda bolǵan. Saǵat 11:10 shamasynda soqtyǵys saldarynan júk kóligi órtenip, taǵy úsh kólikti soqqan. Oqiǵa ornynan túsirilgen kadrlar áleýmettik jelide tarap ketti.
"Oqiǵa ornyna Tótenshe jaǵdailar ministrliginiń órt sóndirý jáne avariialyq-qutqarý jasaǵy jetip, olar órtti 25 minýt ishinde sóndirdi. Órtti sóndirý kezinde asýdyń bir jaǵy ýaqytsha jabyldy", - dep túsindirdi ministrlik.
Qozǵalys 12:30-da qalpyna keltirilgeni atap ótildi.
"Aldyn ala málimet boiynsha, jol-kólik oqiǵasy saldarynan 6 adam zardap shekti, olar jaqyn mańdaǵy meditsinalyq mekemege jatqyzyldy. Órt tolyǵymen sóndirilgennen keiin júrgizýshi júk kóliginde qaza tapqany belgili boldy", - dep tolyqtyrdy vedomstvo ókilderi.
