Sardoba sý qoimasyndaǵy bógettiń buzylýynan bolǵan sý tasqynyna bailanysty Ózbekstanda qylmystyq is qozǵaldy.
Ózbekstan Bas prokýratýrasy Telegram arnasynyń habarlaýynsha, ÓR Qylmystyq kodeksiniń 207-bap 1-bóligi (laýazymdyq nemqurailylyq) men 258-bap 2-bólimi «b» tarmaǵy (taý-ken, qurylys nemese jarylys qaýpi bar jumystardyń qaýipsizdik qaǵidalaryn buzý) boiynsha qylmystyq is qozǵaldy.
Sonymen qatar tergeý jumystaryn júrgizý Ózbekstan Memlekettik qaýipsizdik qyzmeti organdaryna júktelgen.
Aita ketsek, 1 mamyr kúni Ózbekstandaǵy Sardoba sý qoimasyndaǵy bógettiń bir bóliginen sý aǵyp, Ózbekstan Respýblikasy Syrdariia oblysyndaǵy eldimekenderdi sý basty. Kórshiles eldiń oblys basshylary sý qoimasyndaǵy sý kólemin azaitý úshin sý baǵanyn Qazaqstanǵa buryp jibergen. Sonyń saldarynan Qazaqstan Respýblikasy Túrkistan oblysy Maqtaaral aýdanyndaǵy birneshe shekara kollektorlaryna sý tolǵan. Sý deńgeii kóterilgendikten Maqtaaral aýdany shekarasyndaǵy kollektordaǵy sý tasydy.
Ózbekstan Respýblikasy Syrdariia oblysyndaǵy Sardoba sý qoimasy 2017 jyly paidalanýǵa berilgen. Sý qoimasynyń syiymdylyǵy 922 million tekshe metr sýdy quraidy. Onyń qurylysy 2010 jyly Ońtústik Myrzashól arnalarynyń ortalyq jelisi aimaǵynda bastalǵan.
Eske sala keteiik, keshe Ózbekstanda Sardoba sý qoimasynyń bógeti jarylyp, eldi mekender, kommýnikatsiialyq jeli, egistikke zaqym kelgen. Sonyń saldarynan Túrkistan oblysynda 4 aýyldy sý basyp, 620 úi búlindi. Maqtaral aýdanynda 2 mamyrda túngi 00:00-de tótenshe jaǵdai jariialandy.
