ساردوبا سۋ قويماسىنداعى بٶگەتتٸڭ بۇزىلۋىنان بولعان سۋ تاسقىنىنا بايلانىستى ٶزبەكستاندا قىلمىستىق ٸس قوزعالدى.
ٶزبەكستان باس پروكۋراتۋراسى Telegram ارناسىنىڭ حابارلاۋىنشا, ٶر قىلمىستىق كودەكسٸنٸڭ 207-باپ 1-بٶلٸگٸ (لاۋازىمدىق نەمقۇرايلىلىق) مەن 258-باپ 2-بٶلٸمٸ «ب» تارماعى (تاۋ-كەن, قۇرىلىس نەمەسە جارىلىس قاۋپٸ بار جۇمىستاردىڭ قاۋٸپسٸزدٸك قاعيدالارىن بۇزۋ) بويىنشا قىلمىستىق ٸس قوزعالدى.
سونىمەن قاتار تەرگەۋ جۇمىستارىن جٷرگٸزۋ ٶزبەكستان مەملەكەتتٸك قاۋٸپسٸزدٸك قىزمەتٸ ورگاندارىنا جٷكتەلگەن.
ايتا كەتسەك, 1 مامىر كٷنٸ ٶزبەكستانداعى ساردوبا سۋ قويماسىنداعى بٶگەتتٸڭ بٸر بٶلٸگٸنەن سۋ اعىپ, ٶزبەكستان رەسپۋبليكاسى سىردارييا وبلىسىنداعى ەلدٸمەكەندەردٸ سۋ باستى. كٶرشٸلەس ەلدٸڭ وبلىس باسشىلارى سۋ قويماسىنداعى سۋ كٶلەمٸن ازايتۋ ٷشٸن سۋ باعانىن قازاقستانعا بۇرىپ جٸبەرگەن. سونىڭ سالدارىنان قازاقستان رەسپۋبليكاسى تٷركٸستان وبلىسى ماقتاارال اۋدانىنداعى بٸرنەشە شەكارا كوللەكتورلارىنا سۋ تولعان. سۋ دەڭگەيٸ كٶتەرٸلگەندٸكتەن ماقتاارال اۋدانى شەكاراسىنداعى كوللەكتورداعى سۋ تاسىدى.
ٶزبەكستان رەسپۋبليكاسى سىردارييا وبلىسىنداعى ساردوبا سۋ قويماسى 2017 جىلى پايدالانۋعا بەرٸلگەن. سۋ قويماسىنىڭ سىيىمدىلىعى 922 ميلليون تەكشە مەتر سۋدى قۇرايدى. ونىڭ قۇرىلىسى 2010 جىلى وڭتٷستٸك مىرزاشٶل ارنالارىنىڭ ورتالىق جەلٸسٸ ايماعىندا باستالعان.
ەسكە سالا كەتەيٸك, كەشە ٶزبەكستاندا ساردوبا سۋ قويماسىنىڭ بٶگەتٸ جارىلىپ, ەلدٸ مەكەندەر, كوممۋنيكاتسييالىق جەلٸ, ەگٸستٸككە زاقىم كەلگەن. سونىڭ سالدارىنان تٷركٸستان وبلىسىندا 4 اۋىلدى سۋ باسىپ, 620 ٷي بٷلٸندٸ. ماقتارال اۋدانىندا 2 مامىردا تٷنگٸ 00:00-دە تٶتەنشە جاعداي جارييالاندى.
