Ózbekstanda koronavirýstyń britaniialyq shtamyn juqtyrǵan naýqas tirkeldi. Bul týraly eldiń densaýlyq saqtaý ministrligine siltei otyryp Azattyqtyń Ózbek qyzmeti habarlady.
Ministrliktiń málimetinshe, jańa shtamm 10 jasar qyzdan anyqtalǵan. Ol 23 qańtar kúni týystarymen birge Dýbaidan oralǵan.
"Áýejaida jasalǵan ekspress-test oń nátije kórsetip, ol [qyz] infektsiialyq aýrýhanaǵa jiberildi. Sol kúni fýnktsionaldy-klinikalyq tekserý júrgizilip, simptomsyz ótip jatqan Covid aýrýy diagnozy qoiyldy" delingen ministrlik habarlamasynda.
Habarlamada naýqastyń týystarynan koronavirýs anyqtalmaǵany, olardyń úi karantininde jatqany aitylǵan.
Ministrlik naýqastyń jaǵdaiy qanaǵattanarlyq, eshqandai shaǵymy joq dedi.
Ózbekstan densaýlyq saqtaý ministrligi sanitarlyq-gigienalyq erejelerdi oryndaýǵa, qoǵamdyq oryndarda maska taǵyp, qashyqtyq ustanýǵa shaqyrdy.
"Qajettilik bolmasa, shetelge shyqpaýǵa shaqyramyz" delingen habarlamada.
Djons Hopkins ýniversitetiniń dereginshe, Ózbekstanda barlyǵy 78,7 myń Covid naýqasy tirkelgen. Onyń ishinde 621 naýqas qaitys bolǵan.
Ortalyq Aziianyń ózge elderindegidei Ózbekstan resmi deregine kúmán keltiretinder de bar.
