Ózbekstanda epidemiologiialyq jaǵdaidyń nasharlaýyna bailanysty barlyq buqaralyq is-sharalar ýaqytsha toqtatylady, dep habarlaidy "Ult aqparat".
Tiisti sheshim jaqynda koronavirýsqa qarsy is-qimyl jónindegi arnaiy respýblikalyq komissiiada qabyldandy.
«Munda barlyq merekelik buqaralyq is-sharalar, sporttyq sharalar sondai-aq kontsertter, festivalder, teatr jáne kinokórsetilimder týraly aitylyp otyr. Sharanyń qai jerde ótetini – ashyq alańda nemese jabyq ǵimaratta uiymdastyrylýy mańyzdy emes, bárine shekteý qoiylady. Al sporttyq jarystardy jankúierlersiz ótkizýge bolady», - delingen habarlamada.
Sonymen birge, 1 tamyzdan bastap Ózbekstan aýmaǵynda toi, jerleý jáne basqa da otbasylyq sharalar ótkizýdegi sanitarlyq-gigienalyq erejelerdiń saqtalýyn baqylaý kúsheitiledi jáne oǵan qatysýshylar sany 50 adamǵa deiin shekteledi.
Ózbekstannyń densaýlyq saqtaý ministrliginiń málimetinshe, bul tyiymdar koronavirýs boiynsha sanitarlyq-epidemiologiialyq jaǵdai jaqsarǵansha kúshinde bolady.
Eske sala keteiik, 28 maýsymnan bastap Ózbekstanda epidemiologiialyq jaǵdaidyń ýshyǵýyna bailanysty karantindik talaptar kúsheitildi.
