Samarqandaǵy jeke emhanalardyń birinde zańsyz abort jasalyp kelgen: jańa týǵan nárestelerdi satqan, al álsiz balalardy órtegen. Atyshýly bul is týraly Ózbekstan Bas prokýratýrasynyń aiasyndaǵy "Hýkýk" gazeti habarlady.
Aqpannyń sońynda emhananyń bas dárigeri Nigorý Salihanovty (balalar dárigeri) 13 jyl eki aiǵa, akýsher-ginekolog D.Najimovaty 12 jyl alty aiǵa bas bostandyǵynan aiyrǵan.
Jazadan basqalary da qutyla almady. Perzenthana kesheninde jumys istegen Najimova negizgi bailanys kózi bolǵan. Ol abort jasatqysy kelgen, biraq dárigerler túsik jasatýǵa keńes bermegen áielder osy mamanǵa habarlasyp, máselesin sheship otyrǵan.
Najimova zańsyz qyzmeti úshin aqysyn keliskennen keiin olardy Salihanovtyń jeke emhanasyna jatqyzǵan. Túsik jasaýǵa túrli ádister qoldanylǵan, al túsken qarajat osy top múshelerine úlestirilip otyrǵan. Osy toptyń taǵy bir múshesi E.Salihanova bolsa bala asyrap alýǵa daiyn azamattarmen bailanys ornatýmen ainalysqan. Tiri qalyp, jaǵdaiy turaqty bolǵan sábilerge aborttan keiin jalǵan qujat jasalyp, jańa ata-anasyna satyp otyrǵan. Al satyp alýshysy tabylmaǵan sábilerdi qasaqana qaraýsyz qaldyrǵan. Al denelerin meditsinalyq qaldyqtardy órteýge arnalǵan peshke jaǵyp otyrǵan.
Gazet bala satýdyń birneshe deregin keltirip otyr. 2014 jyldyń aqpanynda Salihanova jańa týǵan sábidi 2500 dollarǵa satqan. Al mamyrda qylmystyq top jańa otbasyna sábi satýǵa ýáde bergen. Júkti kelinshekterdiń birine jasandy túsik jasatý jolyn qoldanyp, 500 dollar jáne 200 myń somǵa satqan.
Bas prokýratýra gazeti osyndai adam óltirý oqiǵalaryn tizip otyr. Balalardyń máiitin Salihova Najimova jumys isteitin keshenge jiberip otyrǵan, al ol óz kezeginde balalardy peshke jaǵýmen ainalysqan.
Sot kezinde 2016 jyly emhanada jumys istegen eden jýýshy sumdyq jaǵdaidy aityp berdi.
"Biz áriptesimizben áielderdiń bala bosanǵanynan keiin jumys isteitinbiz, olarǵa kómektesip, jaǵdaiyn qaraitynbyz. Jańa týǵan balalardyń denesin mataǵa orap, 18-shi bólmedegi tońazytqyshqa salatynbyz. Bala tiri qalatynyn baiqasaq, ony peshi bar jyly bólmege jatqyzatynbyz. Odan keiin tiri qalǵan jáne ólip ketken balalardyń qaida jiberilgenin bilmeimin", - dedi kýáger.
