Ózbekstannyń Namangan oblysynda memlekettik balabaqshada 5 jastaǵy qyzǵa jynystyq zorlyq jasaldy degen kúdikpen 52 jastaǵy er adam ustaldy, dep habarlaidy ult.kz.
Oqiǵa Úshqorǵan aýdanyndaǵy balabaqshalardyń birinde bolǵan. Kúdikti atalǵan mekemede sharýashylyq meńgerýshisi bolyp jumys istegen. Quqyq qorǵaý organdarynyń málimetinshe, qyzǵa qatysty jynystyq zorlyq faktisi boiynsha qylmystyq is qozǵalǵan.
Kúdikti protsessýaldyq tártippen ustalyp, qamaýǵa alynǵan. Is Ózbekstan Qylmystyq kodeksiniń 118-baby 4-bóligi jáne 112-baby 1-bóligi boiynsha tergelip jatyr. Qazir bastapqy tergeý amaldary júrgizilýde.
Balanyń meditsinalyq jáne ginekologiialyq saraptamadan ótkeni habarlandy. Ózbekstannyń Balalar ombýdsmeni istiń tergelýin baqylaýyna alǵan.
Balanyń anasy ne deidi?
Balanyń anasy BAQ-qa bergen suhbatynda qyzynyń balabaqshany kórgen kezde qorqatyn bolǵanyn aitqan. Sondai-aq áiel kúdiktiniń balasyna syilyqtar alyp berýge ýáde etip, bolǵan jaǵdaidy eshkimge aitpaýyn suraǵanyn jetkizdi. Bul málimetter anasynyń sózine negizdelgen jáne tergeý barysynda tekserilip jatyr.
Oqiǵadan keiin Ózbekstannyń Mektepke deiingi jáne mekteptik bilim ministrligi memlekettik balabaqshalardaǵy qyzmetkerlerdi tekserýdi bastaǵany habarlandy.
Ózbekstanda ólim jazasyn qaitarý usynyldy
Ózbekstan Prezidenti Ákimshiliginiń basshysy Saida Mirziioeva Namangan oblysynda bes jasar qyzǵa qatysty bolǵan zorlyq-zombylyqtan keiin balalarǵa qarsy aýyr qylmystar úshin jazany barynsha qatańdatýdy usyndy.
Ol Namangandaǵy qaiǵyly jaǵdai týraly estigende «shyn máninde ashýlanǵanyn» aitty. Mirziioevanyń pikirinshe, mundai asa aýyr qylmystar úshin ólim jazasy qoldanylýy kerek.
Alaida qazirgi Ózbekstan zańnamasynda ólim jazasy qarastyrylmaǵan. Osyǵan bailanysty bilik qylmystyq jaýapkershilikti barynsha kúsheitý úshin zańnamaǵa ózgerister engizý jóninde usynystar daiyndap jatyr.
Mirziioeva tiisti organdarǵa qajetti tapsyrmalar berilgenin aityp, qylmysqa qatysy bar adam zań aiasyndaǵy eń qatań jazaǵa tartylatynyn jetkizdi.
Sonymen qatar balanyń qaýipsizdigin qamtamasyz etpegen jáne nemquraidylyq tanytqan jaýapty tulǵalardyń da jazalanatynyn málimdedi.
