Ózbekstan syrtqy ister ministrligi Resei syrtqy ister ministrliginiń resmi ókili Mariia Zaharovanyń memlekettik tilde is júrgizý týraly Ózbekstan zań jobasy jaily sózine bailanysty málimdeme jasady.
Málimdemede Zaharovanyń aty-jóni atalmaǵan, biraq "keibir sheteldik sheneýnikter" degen sózden kimdi meńzeitini baiqalǵan.
Ótken aptada Resei syrtqy ister ministrliginiń resmi ókili "Ózbekstannyń jańa zań jobasyn qoldaityndar azshylyq" dep sanaitynyn bildirgen.
Zaharovanyń sózi "Ózbekstannyń ishki isine aralasý" retinde baǵalanǵan.
Ózbekstan syrtqy ister ministrligi "memlekettik tildi retteý máseleleri memlekettiń ishki isi bolyp sanalady, oǵan aralasýǵa jol berilmeidi" dep málimdedi jáne 1995 jyly qabyldanǵan "Memlekettik til týraly" Ózbekstan zańynyń 9-babyna sai memlekettik bilik organdarynyń jumysy memlekettik tilde júrgiziletinin eske saldy.
Taiaýda "Ózbekstan Respýblikasynyń Ákimshilik jaýapkershilik kodeksiniń 42-babyna ózgerister engizý týraly" zań jobasy qoǵam talqylaýyna shyǵarylǵan. Jobada memleketttik organdar men mekemeler jumysynda memlekettik til týraly zań talaptary saqtalmasa, jaýapty laýazymdy tulǵalarǵa 446 myńnan 1,1 million sýmǵa deiin ($44-108) aiyppul salý máselesi qarastyrylǵan.
Zań talqylaýǵa shyǵarylǵannan keiin Ózbekstan ádilet ministrliginiń baspasóz hatshysy Sevara Ýrinbaeva "Reseidiń kei aqparat quraldary men Ózbekstandaǵy keibir orys tildi saittardy ministrlik usynǵan zań jobasyn burmalap túsindirdi" degen bolatyn.
Sevara Ýrinbaevanyń sózinshe, bul bastamanyń tek qana memlekettik organdarǵa qatysy bar, odan eshkimniń quqyǵyna nuqsan kelmeidi, Ózbekstanda turatyn azamattarǵa ózge tilde sóilegeni úshin aiyppul salynbaidy.
