ٶزبەكستان سىرتقى ٸستەر مينيسترلٸگٸ رەسەي سىرتقى ٸستەر مينيسترلٸگٸنٸڭ رەسمي ٶكٸلٸ مارييا زاحاروۆانىڭ مەملەكەتتٸك تٸلدە ٸس جٷرگٸزۋ تۋرالى ٶزبەكستان زاڭ جوباسى جايلى سٶزٸنە بايلانىستى مەلٸمدەمە جاسادى.
مەلٸمدەمەدە زاحاروۆانىڭ اتى-جٶنٸ اتالماعان, بٸراق "كەيبٸر شەتەلدٸك شەنەۋنٸكتەر" دەگەن سٶزدەن كٸمدٸ مەڭزەيتٸنٸ بايقالعان.
ٶتكەن اپتادا رەسەي سىرتقى ٸستەر مينيسترلٸگٸنٸڭ رەسمي ٶكٸلٸ "ٶزبەكستاننىڭ جاڭا زاڭ جوباسىن قولدايتىندار ازشىلىق" دەپ سانايتىنىن بٸلدٸرگەن.
زاحاروۆانىڭ سٶزٸ "ٶزبەكستاننىڭ ٸشكٸ ٸسٸنە ارالاسۋ" رەتٸندە باعالانعان.
ٶزبەكستان سىرتقى ٸستەر مينيسترلٸگٸ "مەملەكەتتٸك تٸلدٸ رەتتەۋ مەسەلەلەرٸ مەملەكەتتٸڭ ٸشكٸ ٸسٸ بولىپ سانالادى, وعان ارالاسۋعا جول بەرٸلمەيدٸ" دەپ مەلٸمدەدٸ جەنە 1995 جىلى قابىلدانعان "مەملەكەتتٸك تٸل تۋرالى" ٶزبەكستان زاڭىنىڭ 9-بابىنا ساي مەملەكەتتٸك بيلٸك ورگاندارىنىڭ جۇمىسى مەملەكەتتٸك تٸلدە جٷرگٸزٸلەتٸنٸن ەسكە سالدى.
تاياۋدا "ٶزبەكستان رەسپۋبليكاسىنىڭ ەكٸمشٸلٸك جاۋاپكەرشٸلٸك كودەكسٸنٸڭ 42-بابىنا ٶزگەرٸستەر ەنگٸزۋ تۋرالى" زاڭ جوباسى قوعام تالقىلاۋىنا شىعارىلعان. جوبادا مەملەكەتتتٸك ورگاندار مەن مەكەمەلەر جۇمىسىندا مەملەكەتتٸك تٸل تۋرالى زاڭ تالاپتارى ساقتالماسا, جاۋاپتى لاۋازىمدى تۇلعالارعا 446 مىڭنان 1,1 ميلليون سۋمعا دەيٸن ($44-108) ايىپپۇل سالۋ مەسەلەسٸ قاراستىرىلعان.
زاڭ تالقىلاۋعا شىعارىلعاننان كەيٸن ٶزبەكستان ەدٸلەت مينيسترلٸگٸنٸڭ باسپاسٶز حاتشىسى سەۆارا ۋرينباەۆا "رەسەيدٸڭ كەي اقپارات قۇرالدارى مەن ٶزبەكستانداعى كەيبٸر ورىس تٸلدٸ سايتتاردى مينيسترلٸك ۇسىنعان زاڭ جوباسىن بۇرمالاپ تٷسٸندٸردٸ" دەگەن بولاتىن.
سەۆارا ۋرينباەۆانىڭ سٶزٸنشە, بۇل باستامانىڭ تەك قانا مەملەكەتتٸك ورگاندارعا قاتىسى بار, ودان ەشكٸمنٸڭ قۇقىعىنا نۇقسان كەلمەيدٸ, ٶزبەكستاندا تۇراتىن ازاماتتارعا ٶزگە تٸلدە سٶيلەگەنٸ ٷشٸن ايىپپۇل سالىنبايدى.
