Ózbekstan prezidenti Aqtóbe oblysyndaǵydai qaiǵyly oqiǵalarǵa nendei jaǵdailardyń itermeleitinin aitty, - dep habarlaidy kaz.tengrinews.kz RIA Novosti agenttigine silteme jasap.
Ózbekstan prezidenti Shavkat Mirzieevtiń aitýynsha, Qazaqstanda órtenip, Ózbekstan azamattarynyń qaza tabýy ózbek jerindegi jumyspen qamtý jaǵdailarynyń joqtyǵyn kórsetti.
"Bolǵan qaiǵyly jaǵdai kóp nárseni kórsetip berdi, ásirese, bizdiń halyqtyń aldyndaǵy qaryzymyzdyń kóp ekenin. Biz jaǵdai jasap bermegen soń, adamdar jumysty ózge elderden izdeýge májbúr", - dep málimdedi Mirzieev.
Prezidenttiń aitýyna qaraǵanda, Ózbekstandaǵy bilik pen barlyq saladaǵy basshylardyń respýblikada jumys oryndaryn ashý máselesin sheshpei, kemshilikterin túzemegenderi saldarynan osyndai qaiǵyly jaǵdai boldy.
Ózbekstannyń SIM málimetteri boiynsha, Aqtóbedegi avtobýs apatynan qaza tapqandardyń denesi prezidenttiń sheshimimen 20 qańtarǵa qaraǵan túni Tashkentke jetkizildi. Al tiri qalǵandardyń ekeýi tekserý sharalaryna bailanysty Aqtóbede qaldy.
Eske salaiyq, osyǵan deiin Aqtóbede avtobýs órtenip, 52 adamnyń qaza tapqany jaily habarlanǵan bolatyn. Ikarus markaly avtobýstyń 18 qańtarda saǵat 10:30-da Aqtóbe oblysy Yrǵyz aýdanynda Samara - Shymkent tasjolynyń 1068 shaqyrymynda, Qalybai aýylynan 10 shaqyrym jerde órtengeni aitylǵan edi. Avtobýstyń ishinde 55 jolaýshy jáne eki júrgizýshi bolǵan. Onyń beseýi avtobýstan shyǵyp úlgergen. Keiin oqiǵa ornynan túsirilgen video men fotosýretter jariialandy. Sonymen qatar, IIM ókilderi órttiń neden shyqqanyn aitty.
