Ózbekstan innovatsiialyq damý ministrligi qytailyq koronavirýs vaktsinasyn klinikalyq synaqtan ótkizý úshin eriktiler jinai bastaǵanyn habarlady. Innovatsiialyq damý ministri Ibrohim Abdýrahmanovtyń sózine qaraǵanda, Tashkentke 5 myń vaktsina dozasy ákelingen, eriktiler jinalǵan soń 4 aiǵa sozylatyn synaq bastalady.
Abdýrahmanovtyń habarlaýynsha, synaq Tashkenttegi otbasy klinikalarynda júrgiziledi, oǵan 18 jas pen odan asqan eriktiler qatysady.
Bilik eriktilerge aqsha tóleitinin aityp otyr, biraq ótemaqy mólsheri aitylmaidy.
Elge Qytaidan tórt maman kelgen. Synaq bastalmai turyp, vaktsinatsiialaý sharttary jóninde trening ótkizý úshin taǵy 5 adam keledi.
Osyǵan deiin Ózbekstan innovatsiialyq damý ministrligi men Qytai ǵylym akademiiasynyń mikrobiologiia institýty jáne qytailyq Anhui Zhifei Longcom Biopharmaceutical kompaniiasy ókilderi arasynda kelissóz júrgizilgeni habarlanǵan edi, izinshe elge qytailyq vaktsina jetkizilgen.
Buǵan deiin ministrlik synaq sátti aiaqtalsa, Ózbekstan vaktsina satyp alý boiynsha túrli artyqshylyqtarǵa ie bolady degen edi.
Ózbekstan densaýlyq saqtaý ministriniń birinshi orynbasary Bahodir Iýsýpaliev memleket Resei men Qytaidan koronavirýs vaktsinasyn satyp alý múmkindigin qarastyrady dep habarlaǵan. Ministrlik ókiliniń aitýynsha, memleket eń birinshi kezekte "vaktsinanyń qaýipsizdigi men tiimdiligine" nazar aýdarady.
Qazir ózge elderde de ondaǵan vaktsina daiyndalyp jatyr.
Reseide koronavirýstan qorǵaityn eki vaktsina tirkelgen: Gamaleia atyndaǵy ortalyqtyń Sputnik V jáne Novosibirskidegi "Vektor" ortalyǵynyń "EpiVakKorona" vaktsinasy. Qazan aiynyń sońynda Gamaleia ortalyǵy synaqqa qatysqan keibir eriktilerden koronavirýs anyqtalǵanyn habarlaǵan. Qazir vaktsina synaqtyń úshinshi kezeńinen ótip jatyr. Oǵan 40 myń adam qatysyp jatyr.
Amerikanyń Pfizer jáne nemistiń BioNTech kompaniiasy dúisenbi kúni taratqan ortaq málimdemesinde Covid-19 indetine qarsy synaqtan ótip jatqan vaktsina koronavirýstan 90 paiyz qorǵai alatynyn kórsetti dep habarlaǵan bolatyn. Synaqqa 43 538 erikti qatysqan. Olarǵa vaktsina men platsebo egilgen. Synaqqa qatysqandar arasynda 94 adam koronavirýspen aýyrǵan. Kompaniia ókilderiniń aitýynsha, synaq jalǵassa, tiimdilik deńgeii ózgerýi múmkin. Vaktsinanyń adamdardy qansha ýaqyt qorǵai alatyny aitylmaǵan.
