Ózbekstannyń Almatydaǵy bas konsýldyǵy «qańtar oqiǵasyna» bailanysty qamaýǵa alynǵan ózbek azamaty Sáken Tálipovke bailanysty Qazaqstanǵa nota joldanǵanyn málimdedi. Qazaqstan syrtqy ister ministrligi de muny rastaidy. Biraq qujatta naqty ne jazylǵany týraly konsýldyq ta, ministrlik te jaýap berýden bas tartty, dep habarlaidy Azattyq radiosy.
17 jastaǵy Sáken Tálipov Qazaqstanǵa byltyr kúzde, osynda birneshe jyldan beri turatyn anasynyń qasyna kóship kelgen. Kámeletke tolmaǵandyqtan azamattyq alyp úlgermegen. Anasymen birge Almatydaǵy turǵyn úi kesheniniń birinde kúzetshi bolyp jumys isteidi. Týystarynyń aitýynsha, ol 4 qańtarda «Almaty arenadaǵy» beibit jiynǵa barǵan. Kópshilikpen birge ákimdikke deiin jetken. Sol jerde jatqan politsiia qalqany men dýbinkasyn alǵany kameraǵa túsip, aqpannyń basynda qamaýǵa alynǵan.
Sákenniń anasy Kámshat Derbisálieva uly qalany durys bilmeitinin, sherýge qasyndaǵy dosy ertip barǵanyn aitady.
Sáken Tálipovtyń ústinen «jappai tártipsizdikke qatysý» jáne «tótenshe jaǵdai kezinde quqyq qorǵaý organ qyzmetkeriniń ómirine qaýip tóndirý» baptary boiynsha eki qylmystyq is qozǵalǵan. Biraq advokaty ekinshi is boiynsha eshqandai dálel joq deidi. Onyń sózinshe, tergeý materialddarynda tek Sákenniń alańda júrgen videosy bar.
Qazir ol sot sheshimimen eki aiǵa qamaýǵa alynǵan. Sot «Kúdikti anasyn tyńdamai, Ózbekstanǵa qashyp ketýi múmkin» dep, advokattyń bultartpaý sharasyn úiqamaqqa almastyrý jóninde ótinishin qanaǵattandyrmaǵan. Anasy «balam mensiz shekaradan óte almaidy, sot kúdigi qisynǵa kelmeidi» deidi. Sózinshe, balasy tergeýden shyqqanda densaýlyǵy nasharlaǵanyn baiqaǵan. Ony abaqtyda azaptap jatyr ma dep qorqady.
Qańtar oqiǵalaryna bailanysty Qazaqstanda onnan astam shetel azamaty ustalǵan. Eki qyrǵyz, bir ózbek azamaty qaitys boldy. Bilik qańtardyń basynan beri dúrbeleńge «syrtqy kúshterdi» aiyptap keledi. Olar Ortalyq Aziia elderiniń birinen kelgenin aitady. Biraq naqty aiǵaq keltirmeidi. Buǵan deiin «búlikshi» retinde atalǵan eki qyrǵyz azamaty úshin Qyrǵyzstan Qazaqstanǵa qarsylyq notasyn joldap, azamattaryn elge qaitarǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
