Ózbekstannyń tanymal aqyn-jazýshylary prezident Shavkat Mirziiaevtyń atyna ashyq hat jazyp, «Ózbekstannyń halyqtyq qozǵalysy» lideri ári tanymal aqyn 69 jastaǵy Muhammad Salihtyń elge oralýyna kepildik berýin suraidy. Ashyq hat Facebook áleýmettik jelisinde keńinen taraldy, dep jazady centralasian.org.
Ózbekstan jazýshylar odaǵynyń burynǵy birinshi hatshysy, ózbek parlamentiniń eks-depýtaty, elde «Birlik» dep atalǵan saiasi qozǵalystyń jáne «Erik» dep atalatyn demokratiialyq partiianyń negizin qalaǵan Muhammad Salih 1992 jyldan beri shetelde turyp keledi.
«Biz sizdiń taǵy bir tarihi sheshimińiz aqyn Muhammad Salihqa qatysty bolǵanyn qalaimyz. Ol 25 jyldan beri otanynan jyraqta júr. Burynǵy rejim júrgizgen burys nasihattyń saldarynan qoǵamda Muhammad Salihqa degen úrei qalyptasty. Biraq shyǵarmashyl ziialy qaýym onyń uly aqyndyǵyn umytqan joq. Muhammad Salih birinshi kezekte aqyn. Sosyn baryp saiasatker. Ol eldiń táýelsizdigi úshin saiasatpen aralasýyna týra keldi», – delingen ashyq hatta.
2017 jyldyń naýryz aiynda Muhammad Salih birinshi ret prezident Mirziiaevtyń atyna ashyq hat jazǵan. Biraq osydan keiin Ulttyq qaýipsizdik qyzmeti (UQQ) «eldegi konstitýtsiialyq júieni kúshtep buzbaq boldy» degen aiyppen, onyń ústinen qylmystyq is qozǵady. Osy iske bailanysty jýrnalist Bobomýrod Abdýllaev ta tutqyndalǵan. Muhammad Salih bul aiyptaýlardy UQQ-nyń burynǵy basshysy Rýstam Inoiatovtyń elge kirgizbes úshin, ádeii jasap otyrǵany dep ataǵan.
1993 jyldyń sáýirinde Salih «memleketke satqyndyq jasady» dep ustalǵan. Biraq halyqaralyq uiymdardyń qysymymen ol bostandyqqa shyqty. Osydan keiin ol Túrkiiaǵa qashyp ketken. Sodan beri Stambulda turyp keledi. 1999 jyly Ózbekstannyń Joǵarǵy Soty Tashkentte jarylys uiymdastyrdy degen aiyppen, uzaq merzimge syrttai túrme jazasyna kesken.
