Tashkentte tanymal ózbek ǵalymy Andrei Kýbatin koronavirýstan qaitys boldy. "Tyńshylyq" baby boiynsha sottalǵan ǵalym shamamen bir jyl buryn aqtalyp, qamaýdan shyqqan edi.
Ózbekstan ǵylym akademiiasyna súiengen ózbek aqparat quraldarynyń jazýynsha, 36 jastaǵy Kýbatin 29 qazanda Tashkent aýrýhanasynda qaitys bolǵan.
Zańger, quqyq qorǵaýshy Stiv Sverdlov Kýbatinniń týystary ǵalymnyń ólimin rastady dep habarlaǵan.
Tanymal túrkolog-ǵalym, Ortalyq Aziia elderi tarihynyń bilgiri, kóne uiǵyr jazbasyn tanityn Kýbatin 2017 jyly Ózbekstanǵa baratyn týristerge arnalǵan nusqaýlyq shyǵarýdy josparlaǵan túrik kompaniiasyna qoljazba kóshirmelerin berdi dep aiyptalyp, 11 jylǵa bas bostandyǵynan aiyrylǵan.
2018 jyly Kýbatinniń túrme jazasy bes jylǵa deiin qysqardy. 2019 jyly qyrkúiek aiynda Tashkent soty ony aqtap, qamaýdan bosatty. Osyǵan deiin birneshe eldiń ǵalymdary Ózbekstan prezidenti Shavkat Mirziiaevqa ashyq hat jazyp, Kýbatindi bosatýǵa shaqyrǵan.
Sońǵy aqparat boiynsha, Ózbekstanda koronavirýs juqtyrǵandar 66 313 adamǵa jetken, indet bastalǵaly beri 560 adam qaitys bolǵan.
