Sholpan-Atada (Qyrǵyzstan) ótip jatqan Eýraziialyq úkimetaralyq keńes otyrysy alańynda QR Premer-Ministri Álihan Smaiylov RF Úkimetiniń tóraǵasy Mihail Mishýstinmen kezdesý ótkizdi, dep habarlaidy QR Úkimetiniń baspasóz qyzmeti.
Álihan Smaiylov Qazaqstan men Resei yntymaqtastyǵynyń nyǵaiýyna joǵary deńgeidegi turaqty kezdesýlerdiń serpin berip otyrǵanyn, sondai-aq eki el arasyndaǵy memleketaralyq bailanystar barlyq baǵyttar boiynsha ózara is-qimyldyń joǵary deńgeiine kóterilgenin atap ótti.
«Ózara múddelerdi eskere otyryp, dáiekti birlesken jumysty jalǵastyrýymyz kerek», — dedi Premer-Ministr.
Úkimet basshysy ótken 30 jyl ishinde memleketter arasynda senimdi jáne syndarly dialog ornatylǵanyn atap ótti. Saýda-ekonomikalyq yntymaqtastyq qarqyndy damyp keledi, óńiraralyq yntymaqtastyq jáne isker toptardyń bailanystary nyǵaiýda.
«Resei – bizdiń negizgi saýda-ekonomikalyq seriktesimiz. 2021 jyldyń qorytyndysy boiynsha ózara taýar ainalymy úshten birge ósip, $24,2 mlrd kóleminde rekordtyq kórsetkishke qol jetkizdik. 2022 jyldyń birinshi jartyjyldyǵynda da saýda 5%-ǵa artty. Jyl qorytyndysy boiynsha oń qarqyn saqtalyp, damitynyna senim artamyz», — dedi Álihan Smaiylov.
Sonymen qatar Premer-Ministr aǵymdaǵy jaǵdaida ekijaqty saýda-ekonomikalyq bailanystardyń kún tártibine jedel, salmaqty jáne ózara tiimdi sheshimderdi qajet etetin jańa tarmaqtar shyǵarylatynyn aitty.
«Biz pragmatikalyq jáne senimdi arnada júieli, birlesken jumysty jalǵastyrýymyz kerek», — dep atap ótti Álihan Smaiylov.
Óz kezeginde Mihail Mishýstin Reseidiń Qazaqstanmen tatý kórshiligi men dostyǵyn baǵalaitynyn atap ótti.
«Biz importty almastyrý boiynsha birlesken baǵdarlamalardy júzege asyrýdyń jaqsy perspektivalaryn kórip otyrmyz. Ónerkásip, energetika, mashina jasaý, kólik infraqurylymy, beibit atom, tsifrlandyrý siiaqty salalarda jańa strategiialyq jobalardy iske qosý úshin múmkindikter bar. Atalǵan máseleler bizdiń turaqty nazarymyzda», — dedi Mihail Mishýstin.
Kelissóz barysynda taraptar ónerkásiptik kooperatsiiaǵa qajetti ónimderdi jetkizý, qazaqstandyq shikizat tranziti, sondai-aq taýarlardy kedergisiz shyǵarý máselelerin talqylady.
Sondai-aq Qazaqstannyń soltústik jáne shyǵys óńirlerin gazdandyrý máseleleri, Kaspii qubyr konsortsiýmy men «Astrahan-Mańǵyshlaq» magistraldyq sý tartqyshynyń qyzmeti qaraldy.
