Turǵyn úi qurylys jinaq bankiniń «Óz úiim» atty jeke baǵdarlamasyna qatysýshylar 2 shildeden bastap zaimdardy jyldyq 7% kólemindegi mólsherlememen ala alady. Bul týraly "Ult aqparat" banktiń baspasóz qyzmetine silteme jasap habarlaidy.
Budan bólek, bank salymshylarynda baspana alý múmkindigi burynǵydan da joǵary bolýy úshin eń tómengi bastapqy jarna kólemi de tómendetilip otyr.
2 shildeden bastap «Óz úiim» baǵdarlamasynyń aiasynda aldyn-ala turǵyn úi zaimyn alý úshin shotta úi baǵasynyń 20%-na teń somanyń basyn quraý jetkilikti bolmaq. Buǵan deiin «Óz úiim» baǵdarlamasynyń aiasyndaǵy nesielerdiń paiyzdyq mólsherlemesi jinaq somasyna táýeldi edi. Shotynda úi qunynyń 30%-yn quraityn bastapqy jarnasy bar salymshy jyldyq mólsherlemesi 9,5% aldyn-ala zaimnan úmitker atanatyn. Al depozitinde baspana baǵasynyń 50%-yn jinaǵan klient 7,5-8,5% aralyǵyndaǵy mólsherlememen nesie alýǵa quqyly bolatyn.
3,5-5% mólsherlememen beriletin turǵyn úi zaimdarynyń sharttary ózgergen joq. Mundai nesieni resimdeý úshin burynǵysha klientke Turǵyn úi qurylys jinaq bankindegi shotyna úi qunynyń 50%-yn keminde 3 jyl ishinde jinap, qajet baǵalaý kórsetkishine qol jetkizý kerek.
Nesielendirýdiń eń joǵarǵy merzimi - 25 jyl. Ol tańdalǵan zaim túrine bailanysty anyqtalady.
«Óz úiim» baǵdarlamasyn Turǵyn úi qurylys jinaq banki 3 jyl buryn memlekettik baǵdarlamalarǵa qoldaý retinde iske qosqan edi. «Óz úiim» jobasy bank salymshylaryna qurylys salýshylar usynatyn jańa úilerdi naryqtaǵydan tómen baǵamen alýǵa múmkindik beredi. Almaty men Astanadaǵy 1 sharshy metrdiń ortasha quny - 260 000-290 000 teńge, al aimaqtarda 180 000-200 000 teńge. Bizdiń esepke sáikes, Turǵyn úi qurylys jinaq bankinde shottaryna úi alýǵa qajet 20% kólemindegi bastapqy jarnany jinaǵan 45 000-dai salymshy bar. Biz qazir osy azamattarǵa qoljetimdi úi satyp alýǵa kómektesip, olardy jańa, jaily jáne baǵasy tómen páterlerge ornalastyrýdy maqsat etip otyrmyz. Bul baǵdarlama aiasynda bank senim bildirip otyrǵan klientterge ǵana emes, eldegi jalpy qurylys sektoryna qoldaý bildiredi, - dep túsindirip ótti Turǵyn úi qurylys jinaq banki basqarma tóraiymy Lázzat Ibragimova.
Osy jyly «Óz úiim» baǵdarlamasynyń aiasynda jalpy somasy 45,8 mlrd teńge bolatyn 3 885 páter satylady dep josparlanyp otyr. Onyń ishinde 623 páterdi bank salymshylary úleskerlik qurylys kezeńinde satyp alady.
