Qyzylorda oblystyq dene shynyqtyrý jáne sport basqarmasynyń bastyǵy Sadyq Mustafaevtyń osy laýazym tizginin ustaǵanyna da on jyldan asyp ketipti. Búginde basqa aimaqtarda bul qyzmetke onymen qatar kelgen basshy joq. Tegi, mundai tabandylyq pen turaqtylyq kórsetý úshin óz kásibińdi janyńdai jaqsy kórýden bólek, ara-tura almasyp turatyn basshylyqqa kórsete alatyn nátijeli jumysyń bolýy kerek shyǵar. Bizdiń Sadyq MUSTAFAEVPEN áńgimemiz osydan óris aldy.
– Qyzmetke 2005 jyldyń 25 qańtary kúni kelip edim. Sodan bergi aralyqta tórtinshi ákimniń basshylyǵynda jumys istep kelemin. Osy jyldarda meniń kóńilge túigenim: óz kásibińdi janyńdai jaqsy kórseń, soǵan orai tiesili jumysyńdy únemi berilip isteseń, alǵa qoiǵan maqsattaryńa da jetesiń. Óz kezeginde basshylyq ta muny baǵalaidy eken. Biz nege jetse de, óz eńbegimen jetken, kásibi men jumysyn qurmettegen qarapaiym otbasynan shyqtyq. Sondyqtan «Jaqsylyq kórsem – ózimnen, jamandyq kórsem – ózimnen» degen qaǵidatty berik ustanamyz. Sondai jaqsylyqqa jetý úshin osy jyldardyń bárinde qaitken kúnde de oblys sportyn damytýǵa, onyń ilgeri jyljýyna dúmpý berýge barymyzdy saldyq. Osynyń arqasynda sporttyń kóptegen salalary boiynsha jurt Syr boiy sańlaqtarymen sanasatyn kúnge jettik.
– Rasynda da Qyzylorda oblysynda sońǵy jyldary buryn zaty turmaq, aty da estilmegen birqatar saiys túrleri qolǵa alyna bastady. Sonyń ishinde qystyq sportqa qyry bolmai kelgen óńirde Muz saraiynyń salynýy úlken jańalyq boldy.
– Aitatyny joq, bul úshin óte kóp ter tógýge týra keldi. Al sol sarai 2013 jyly qatarǵa qosylǵanda, bul qalada qýanbaǵan jan joq shyǵar. Munyń bári aimaq basshysy kórsetken qoldaý men qamqorlyqtyń arqasynda múmkin boldy. Osy arqyly oblys ortalyǵynda biz jasóspirimder arasyndaǵy hokkei komandasyn quryp, mánerlep syrǵanaý men short-trek sportynyń negizin qaladyq. Qudai qalasa, taiaý jyldarda osy sport túrleriniń damýyna Qyzylorda da óziniń laiyqty úlesin qosatyn bolady.
– Jattyqtyrýshy mamandardy qaidan aldyńyzdar?
–Jasóspirimder komandasyn mashyqtandyratyn jattyqtyrýshy Astanadan keldi. Mánerlep syrǵanaý sektsiiasyn basqaratyn mamandy Ýkrainadan aldyrdyq. Al short-trek jattyqtyrýshysyn arnaiy oqytyp alý arqyly jergilikti jerdiń túleginen daiyndadyq.
– Sadyq Shońmurynuly, Qyzylordanyń baiaǵydan brendi ispettes velosport, aýyr atletika, toǵyzqumalaq, qyzdar gandboly, qazaq kúresi siiaqty sporttary qazir qalai damyp jatyr?
– Atalǵan sport túrleri burynǵysynsha Qyzylordanyń maqtanyshy bolyp qala beredi. Olar dál burynǵysha qamqorlyq pen qoldaýdan esh qaǵajý kórmeidi. Biraq ómir bolǵan soń onyń ózi jasap berip turatyn óz túzetýleri de bar. Mysaly, men osy qyzmetke kelgen kezde velosporttan oblystyń atyn shyǵaryp júrgen maitalmandardy biýdjettiń aqshasymen ustap turýǵa shama kelmedi. Ulttyq qurama tek Berik Kópeshevti ǵana óziniń qaraýyna aldy. Keiin negizinen bir-birlerimen qatar bolyp keletin osy býyn sporttan ketken kezde ornyn toltyratyn eshkim bolmady. Sol olqylyqty endi túgendep kelemiz. Aýyr atletikada qanshama soqqy alyp jatqanymyzǵa qaramastan, shákirt tárbieleý úderisi jalǵasýda. Bizde jasóspirimder men jetkinshekter arasynda ósip kele jatqan qýatty býyn bar. Jaqynda Tailandta ótken Aziia chempionatynda Qazaqstan quramasy alǵan jalǵyz júlde – qola medaldi 17 jasar ulanymyz Evgenii Lomanov ákeldi. Qazirgi kúnderi Tokioda ótip jatqan jasóspirimder qurlyq chempionatynda altyn júldeger atanǵan Arystanbek Jahansha – bizden. Sporttyń bul salasynda qol jetkizgen úlken jetistigimiz – olimpiialyq rezerv mektebiniń bólimshelerin barlyq aýdanda ashyp aldyq. Osy kezde aýyr atletikadan jasóspirimder arasyndaǵy birinshiligimizge 300-ge jýyq jas ziltemirshi qatysady! Velosportta da tap osyndai betburystar bar. Qyzylordada jylyna 6 týrnir turaqty túrde ótetininen bólek, ai saiyn ózi ishimizde jarys uiymdastyrylyp turady. Qyzdardyń gandbolyna kelsem, taiaýda bizdiń qalada ótken Aziia komandalarynyń tuńǵysh klýbtyq chempionatynda Qyzylordanyń «Qaisary» bas báigeni jeńip aldy.
– «Qaisar» demekshi, oblysta bir klýbtyń tóńiregine toptasý qolǵa alynǵan eken.
– Biz oiyn sport túrleriniń bárin «Qaisar» degen klýbtyń tóńiregine toptastyrýdy bastadyq. Oǵan fýtbol, gandbol, voleibol jáne kógaldaǵy hokkei komandalary shoǵyrlanady. Sóz reti kelgende aita keteiin, fýtbol komandamyz bir jylǵy úzilisten soń premer-ligaǵa qaita oraldy. Endi onyń aldyna joǵary topta turaqtap qalyp, el súisinetindei oiyn órnegin kórsetý mindeti qoiylyp otyr.
Áńgimelesken
Serik PIRNAZAR,
«Egemen Qazaqstan»
.jpeg)