Almaty ákimi Baqytjan Saǵyntaev qala ortalyǵynda tártipsizdikter bolyp, tonaý kúsheigen kúnderi nemen ainalysqanyn aityp berdi, dep habarlaidy Sputnik Qazaqstan.
"Sol oqiǵalar bolyp, kúsheie túsken kezde ne bolyp jatqanyn jáne ne isteýim qajet ekenin túsindim. Ár saǵat saiyn shyǵyp, aqparat berip, oǵan ýaqyt qurtpai, qaýipsizdik pen qalany saqtap qalýmen ainalysýym kerek ekenin bildim. Bizde eshqandai kúsh bolǵan joq, al ol kúshtik qurylymdy alyp kelý úshin qorǵanys ministri, ishki ister ministri men ákimshilik basshysymen bailanysý kerek. Maǵan qatysty túrli syn aitylatynyn da bildim. Ol ýaqytty men ózimniń imidjim týraly oilamadym, turǵyndardyń qaýipsizdigin oiladym. Barlyq kúsh-jigerimdi salyp, qalany qorǵaýǵa qosymsha kúsh alyp kelmesem, onda men ne istep otyrmyn?", - dedi Baqytjan Saǵyntaev Armanjan Baitasovqa bergen suhbatynda.
Sondai-aq Saǵyntaev qala turǵyndary ony Almaty ákimi qyzmetinen bosatýdy talap etken petitsiiaǵa qatysty túsinikteme berdi.
"Syn aitylatynyn bildim. Árine, bári aiaqtalǵan kezde syn da aityldy, petitsiia da paida boldy. Men de adammyn, ári qarai jumys isteýim kerek, men óz jumysymdy jalǵastyrdym, óitkeni qalany tez qalpyna keltirip, zalaldy óteý qajet. Qalai bolǵanda da, ár synnyń paidasy bar. Renjidim be, joq pa, men qyzmetimdi atqardym. Jaýapkershilikti túsinip, qala tirshiligin qamtamasyz etý kerek ekenimdi bildim", – dedi Saǵyntaev bergen suhbatynda.
Aita keteiik, Qazaqstan Prezidenti Qasym-Jomart Toqaev "Habar" telearnasyna bergen suhbatynda Saǵyntaev megapoliste bolǵan tártipsizdikke bailanysty qiyn jaǵdaiǵa tap bolǵanyn aitty.
"Ony kinálai almaimyn. Qyzmettik mindetterin atqarý jaǵynan adal adam. Alaida almatylyqtardyń kóńil-kúiin de eskerýge mindettimin. Sol sebepti ýaqyt kelgende bilesizder", - dedi Toqaev suhbatynda.
Aita keteri, 6 qańtarda Saǵyntaevtyń kortejine oq atyldy. Shabýyl saldarynan "Almaty" telearnasynyń júrgizýshisi kóz jumdy. Saǵyntaevpen birge júrgen sport basqarmasynyń basshysy, din basqarmasynyń basshysy, qala ákiminiń júrgizýshisi jáne "Almaty" telearnasynyń operatory jaraqat aldy.
