QR Ulttyq ekonomika ministri Álibek Qýantyrov kriptovaliýtaǵa investitsiia salǵysy keletin qazaqstandyqtarǵa birneshe keńes berdi, dep habarlaidy QazAqparat.
Ortalyq kommýnikatsiialar qyzmetinde ótken brifingide BAQ ókilderi Ulttyq ekonomika ministrinen kriptovaliýtaǵa investitsiia salǵan-salmaǵanyn surap, osyndai oida júrgen qazaqstandyqtarǵa keńes berýin ótindi.
«Jeke óz basym kriptovaliýtaǵa aqsha salmaimyn. Ol úshin belgili bir ýaqyt pen qandai da bir bilim-bilik kerek shyǵar. Bul máselege qyzyǵýshylyq tanytqan emespin. Tek Prezident ákimshiliginde jumys istegen kezde monetarlyq sharýalar aiasynda ushyrastym. Qazir kriptovaliýta óndiretin mainerlerge salyq júktemesin ulǵaitýdy qarastyryp jatyrmyz. Dál qazir mainerlerge salynatyn salyq kólemin kriptovaliýta qunyna bailaý qaralyp jatyr. Iaǵni, kriptovaliýta ósse, salyq ósedi. Bul biýdjetke jaqsy», - degen ministr investiialaý táýekelderi týraly paiymyn aitty.
«Bul - árkimniń ózi isi. Biraq árkez táýekel bolady. Kriptovaliýta naryǵynda táýekel tipten joǵary. Óitkeni onyń artynda valiýta dep ataýǵa negiz bolatyndai naqty aktiv joq. Bul tipti derivativ te emes, qolmen ustap, kózben kórýge kelmeitin dúnie. Onyń ústine kriptovaliýta onlain-ámiiandarda saqtalady. Ol ámiian tym alysta ornalasqan bolýy múmkin. Tipti tsifrlyq turǵydan qaraǵannyń ózinde, kóbine siz turatyn aýmaqtan tym alysta ornalasady», - dedi Álibek Qýantyrov.
Onyń aitýnysha, kriptovaliýtaǵa investitsiia salǵan adamdar munda da ártaraptandyrýǵa tyrsýy kerek.
«Bárin bir sebetke salýǵa bolmaidy. Kriptovaliýtadan basqa valiýta siiaqty shynaiy aktivterge de bólshektep qarjy salýǵa bolady. Kriptovaliýtaǵa salǵan investitsiiany da óz ishinde ártaraptandyrý kerek dep oilaimyn. Bir ǵana kriptovaliýtaǵa salýdyń qajeti joq. Bir ǵana bitkoinǵa, bir ǵana laitkoinǵa salý durys emes. Shama kelgenshe ártaraptandyrý kerek. Óitkeni bul naryq túrli trendter kórsetip tur. Kenet túsip nemese kóterilse, úlken aqsha joǵaltyp, barmaq tistep qalýǵa bolady», - dedi ministr.
