Parlament Májilisiniń tóraǵasy Nurlan Nyǵmatýlin oiyn biznesin retteýdi kúsheitýge qatysty pikir bildirdi, dep habarlaidy "Ult aqparat".
Búgin palatanyń jalpy otyrysta «Qazaqstan Respýblikasynyń keibir zańnamalyq aktilerine oiyn biznesi máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
Osy zań jobasy boiynsha depýtattar kóptegen mańyzdy túzetýler engizdi.
«Shyn máninde, igromaniia aýrýǵa jatatyn nárse. Oǵan úirengen adam ony óz kúshimen jeńe almaidy. Sondyqtan, depýtattar jańa norma engizip otyr. Ol boiynsha igromaniiaǵa berilgen azamatty odan shyǵarý úshin týysqandary sotqa bere alady. Bul qajetti jáne tiimdi norma dep esepteimin», - dedi N. Nyǵmatýlin.
Bul turǵyda Májilis tóraǵasy saladaǵy normalar, halyqaralyq tájiribege sai keltirilgenin atap ótti.
«Elimizde biznestiń osy túri jabylmaidy, ony retteý tetikteri eskerilgen. Sáikesinshe, halyqaralyq normalarǵa sai keltirilip otyr. Keibir elderde osy qyzmetterge múldem tyiym salynǵan. Ekinshiden, stavkalardy esepke alý ortalyǵyn qurý nátijesinde salyqty ákimshilendirýdiń tiisti qadamdary esebinen biýdjet kiristeri tómendemeidi. Atap aitqanda, salyq organdary tarapynan naqty baqylaý sharalary eskerilgen», - dedi Nurlan Nyǵmatýlin.
Taǵy bir atap ótetin jaǵdai, zań jobasynda osy sala qyzmetin retteýdiń jańa tásilderi usynylǵan. Májilis tóraǵasynyń aitýynsha, jańa zań ekonomikalyq turǵydan da, moraldyq-psihologiialyq jaǵynan da oiyn biznesi salasyndaǵy baqylaýdy kúsheitedi.
Jalpy, qujat oiyn biznesi salasyndaǵy zańnamany jetildirýge jáne bás tigýge qatysýshylardyń quqyqtary men zańdy múddelerin qorǵaýdy kúsheitýge, sondai-aq býkmekerlik keńseler men totalizatorlardyń qyzmetin baqylaýdyń tiimdiligin arttyrýǵa baǵyttalǵan.
