Foto: ashyq derekkóz
Aqtóbedegi meshit mańynda bolǵan oqiǵadan keiin synǵa ushyraǵan Rústem Júginisov áleýmettik jeli arqyly halyqtan keshirim surady, dep habarlaidy Ult.kz.
Ol alǵashqy jariialaǵan storisinde er adamnyń áreketin «qate» dep atap, din turǵysynan da «bir kúndik neke» túsiniginiń joq ekenin naqty aitty. Sonymen qatar, ekinshi storiste oiyn durys jetkize almaǵanyn moiyndady.
"Oilana kele, sol sáttegi emotsiianyń áserimen kei sózderimde qattylyqqa jol berip, oiymdy durys jetkize almaǵanymdy túsindim. Bul meniń tarapymnan ketken úlken qatelik ekenin moiyndaimyn", - dep jazdy ol.
Júginisov óz sózinde ár adamnyń tańdaýyna qurmetpen qaraitynyn jáne eshkimdi belgili bir kózqarasty ustanýǵa májbúrlemeitinin atap ótti. Sonymen qatar, bul jaǵdaidyń qozǵalýy onyń qyzdaryna degen alańdaýshylyǵymen bailanysty ekenin jetkizdi.
"Men qyz-kelinshekterdi árqashan qoldaimyn. Sebebi, olar bizdiń qoǵamnyń negizi men tiregi. Zorlyq-zombylyq, aldaý, paidalanýshylyq, munyń bárine áiel emes, er adamdardyń kinási bar ekeni tolyqtai RAS! Sondyqtan eń aldymen, ózgeris te, jaýapkershilik te er azamattardan bastalýy qajet", - deidi Rústem Júginisov.
Rústem Júginisov málimdemesin áý basta qyzdardy túrli qaýipti adamdardan qorǵaý maqsatynda aitqanyn jetkizdi.
"Negizinde bul máseleni qozǵaǵanda, eń aldymen qaýipsizdik jaǵyn oilaǵan edim. Iia, men de qyz baǵyp otyrǵan ákemin. Men de qyzdarymdy ýaiymdaimyn. Kesh bata kóshede túrli qaýip tóndiretin er azamattar, iaǵni mas kúidegi adamdar, esirtki áserindegi nemese psihikalyq jaǵdaiy turaqsyz azamattar kezdesýi múmkin. Men tek sol qaýipterden qorǵashtap, qaryndastarymdy ýaiymdaǵandyqtan, emotsiiamen aityp qoidym. Iia, jetkizý formasynan qatelik ketkeni ras. Biraq, meniń nietim eshqashan arý jandardy kinálaý bolmaǵan", - dep túiindedi
Rústem Júginisov bul jaǵdaidyń ózine úlken sabaq bolǵanyn aityp, kópshilikke alǵysyn bildirdi. Ol, ásirese, qyz-kelinshekterden shyn júrekten keshirim surap, olardyń sezimin túsinetinin jetkizdi.
Buǵan deiin Miras Júginisov aǵasynyń málimdemesine qatysty pikir bildirgen edi.
