Búgin Talǵar aýdanynda «Oiqaraǵai Lesnaia skazka» taý-shańǵy kesheni ashyldy. Qysqy týrizmdi damytýdy kózdegen keshenniń ashylý saltanatyna oblys ákimi Amandyq Batalov, nysan investorlary, «Qazaq Týrizm» UK ókilderi qatysty.
Demalýǵa kelgen kishkentai balǵyndarmen birge oblys ákimi A. Batalov nysannyń lentasyn qidy.
Memlekettik - jekemenshik áriptestik negizinde júzege asyrylǵan týristik joba salamatty ómir saltyn qalyptastyrý, buqaralyq sportty damytýǵy yqpal etpek. Nysannyń osy jáne ózge de erekshelikterine toqtalyp ótken oblys ákimi Amandyq Batalov óz quttyqtaý sózinde keshenniń qysqy týrizmdi damytýdaǵy rólin atap ótti.
- Elbasy oblysqa kelgen saparynda týrizm klasterin qalyptastyrý týraly tapsyrma bergen edi. Sonyń ishinde Shymbulaqtan bastap Túrgen shatqalyna deiingi aralyqta taý týrizmin damytý qajettigin aitqan bolatyn. Soǵan bailanysty búgin, mine, jańa taý-shańǵy keshenin ashyp otyrmyz. Memleket tarapynan qoldaý kórsetilip, respýblikalyq mańyzdaǵy avtokólik jolynan keshenge deiingi 6,2 km jolǵa kúrdeli jóndeý jasadyq. Osy taý-shańǵy kýrortyna investor óziniń jeke qarajaty esebinen 60 mln. AQSh dollaryn quidy. Bul - otbasymen kelip, taýdyń taza aýasymen tynystap, shańǵy teýip, syrǵanap, demalýǵa taptyrmaityn oryn. Kelińizder, igiligin kórińizder, syrǵanańyzdar, shattanyńyzdar, - dedi A. Batalov.
Odan keiin investor, «Alina» kompaniialar tobynyń prezidenti Erlik Balfanbaev sóz alyp, osy jobany júzege asyrýǵa qoldaý kórsetken oblys basshylyǵyna, «Qazaq Týrizm» UK-ǵa, taý-shańǵy kesheniniń qurylysyna qatysty kásibi aqyl-keńes bergen avstriialyq áriptesterine, «Alina» kompaniiasynyń mamandaryna, qurylysshylarǵa – barlyǵyna rizashylyǵyn jetkizdi.
Taý-shańǵy kesheniniń jalpy aýmaǵy 85 ga. Teńiz deńgeiinen 1500-1800 metr biiktikte ornalasqan. Munda kelýshiler arnaiy arqan joldarmen biikke kóterilip, tómenge shańǵymen nemese basqa da quraldarmen syrǵanap túsedi. Atalmysh kompaniianyń kommertsiialyq direktory Dmitrii Tsaidyń aitýynsha, munda shańǵy, skeitbord, úrlemeli kameralarmen syrǵanaýǵa arnalǵan, túrli kúrdeliliktegi 15 arnaiy jolaq qarastyrylǵan. Sonymen qatar shańǵy tebýdi úirengisi keletinder úshin shańǵy mektebi bar, onda shetelden kelgen kásibi mamandar jumys isteidi. Nátijesinde 2-3 sabaqtan keiin-aq úirenýshi shańǵy tebýdi meńgerip úlgeredi. Otbasymen belsendi jáne alańsyz demalǵysy keletin azamattardyń kishkentai balalaryn tańerteńnen keshke deiin jyly jerde baǵyp beretin bala kútýshiler de bar. Munda álemdik brend firmalardyń syrǵanaýǵa qajetti zattary men kiim-keshegin jalǵa alý múmkindigi usynylady. Demalys aimaǵy kúnine 5000 otandyq jáne sheteldik týrister men demalýshylardy qabyldaýǵa daiyn.
Jaz mezgilinde shańǵy joldary velosiped tebýge laiyqtalady. Demalýshylarǵa túrli ulttyń as-aýqatyn ázirleitin 6 meiramhana, 99 oryndyq qonaq úi qyzmet kórsetedi. Aldaǵy jyldary qazirgi 13 shaqyrymdyq syrǵanaý jolaqtarynyń uzyndyǵyn 40 shaqyrymǵa deiin jetkizý jospary bar.
