Búgin QR Táýelsizdigi kúni merekesi qarsańynda otyrarlyqtar kópten kútken «Oqsyz» sport kesheniniń ashylý salatanatyna kýá boldy. Túrkistan oblysy ákiminiń orynbasary Tólegen Sársembaevtiń qatysýymen ashylǵan nysan bolashaq chempiondardyń ustahanasyna ainalmaq, dep habarlaidy "Ult aqparat".
Otyrardan shyqqan aqyndar ǵana emes, nebir ǵulama ǵalymdar, óner men sport salalarynyń talai dodaly básekelerde top jaryp júrgen saiypqyran sańlaqtary da abyroiyn aspandatyp, týyn kókke kóterip keledi.
- Táýelsizdiktiń alǵashqy jyldarynan-aq elimiz egemendiktiń eń negizgi alǵy sharttaryn jasai aldy. Bárinen buryn kóp ultty, kóptildi, kóp dindi elimiz halyqtyń aýyzbirligin saqtaýǵa qol jetkizdi. Qazaqstandy meken etken barlyq ulttardyń múddesin ortaqtastyra alǵany - qazirgi zamannyń Atatúrki hám Ult Kóshbasshysy atanǵan Nursultan Ábishuly Nazarbaevtyń syndarly saiasatynyń aiqyn aiǵaǵy edi. Onyń nárli jemisin túrkistandyqtardyń, onyń ishinde otyrarlyqtardyń ómirinen de ańǵarýǵa bolady. Atap aitqanda, aýdanymyzda sońǵy kezde buryn sońdy bolmaǵan igi ister atqarylyp, búgingi tańda jalǵasyn taýyp keledi.
Biylǵy Táýelsizdik merekesi otyrarlyqtar úshin mol tartýlarymen kelip otyr. Álemniń ekinshi ustazy – Ábý Nasyr ál-Farabidiń, kúsh atasy Qajymuhan atamyzdyń týǵan jeri Otyrar aýdanynda zamanaýi talapqa sai «Oqsyz» sport kesheni boi kóterip, el igiligine berilip otyr, - dedi oblys ákiminiń orynbasary Tólegen Sársembaev ǵimarattyń ashylý saltanatynda.
Sport kesheni álemniń ekinshi ustazy atanǵan Ábý Nasyr ál-Farabidiń kindik qany tamǵan ejelgi Oqsyz qalasynyń ataýymen atalady. Eki qabatty ǵimarattyń syiymdylyǵy 210 adamǵa laiyqtalyp, 23 sport úiirmesi jumys jasaidy. Sondai-aq, oblystyq, respýblikalyq dárejedegi túrli sporttyq sharalardy ótkizýge múmkindik tolyǵymen qarastyrylýda.
- QR Prezidenti N.Á.Nazarbaevtyń "Qazaqstandyqtardyń ál-aýqatynyń ósýi: tabys pen turmys sapasyn arttyrý" atty joldaýynda elimiz boiynsha 100 sporttyq nysan salý jóninde aitylǵan bolatyn. Elbasy tapsyrmasyna sáikes otyrarlyqtar alǵashqylardyń qatarynda tamasha sport keshenin paidalanýǵa berdi. Eńseli ǵimarattan aldaǵy kezderde táýelsiz elimizdiń, qut pen kie qonǵan qasietti ólkemizdiń atyn shyǵaryp, álemge tanytatyn nebir chempiondar shyǵatynyna tolyq senimdimiz, - dedi aýdan ákimi Erlan Aitahanov.
Jańa sport kesheninde Túrkistan oblysynyń tórt aýdany men Shymkent qalasynyń balýandary qatysqan túie balýandardyń aqtyq syny ótti. Sheshýshi saiysta Otyrar aýdanynyń namysyn qorǵaǵan Joldasbek Bektursynov jeńimpaz atanyp, 1 mln teńgeni qanjyǵasyna bailady.
