Arheolog-ǵalymdar men restavratorlar «Ejelgi Otyrar qalasyn ishinara qalpyna keltirý» jobasy aiasynda tiisti jumystardy tolyǵymen aiaqtady. Bul týraly Mádeniet jáne sport ministrliginiń baspasóz qyzmeti habarlaidy.
Otyrar qalashyǵyn ishinara qalpyna keltirý jobasy boiynsha jumys nátijelerimen tanysý barysynda Dáýren Abaev týrbiznes ókilderimen kezdesti. Jiynda ministr «Uly Jibek joly» týryn uiymdastyryp, jetildirý boiynsha tapsyrma berdi.
Ǵalymdar ejelgi qalashyq aýmaǵynda Aq Orda bileýshisi Erzen han salǵan Hanakanyń ornyn tapty. Sondai-aq, mamandar kúidirilgen kirpishten qalanǵan meshit pen XV ǵasyrdyń basynda Ámir Temir Toqtamys hannyń elshilerin qabyldaǵan Berdibek saraiyn ishinara restavratsiialady, «Jaraqty», Soltústik jáne Sopyhan qaqpalaryn tolyǵymen qalpyna keltirdi.
Qalaǵa «Jaraqty» qaqpasy arqyly kirgen tusta turǵyn úiler men qysh sheberhanasy bar keshen tabyldy. Turǵyn úilerdiń mańynda óndiris oryndary ornalasqan, onda qysh ydystar jasalatyn eki kameraly pesh pen qysh buiymdar keptiriletin alań anyqtaldy. Ǵalymdar turǵyn úilerdegi sheberhanalar XV-XVI ǵasyrlarda jumys istegenin aitady. Sondai-aq, XVII ǵasyrdaǵy bazar alańynda da qazba jumystary júrgizildi, onda naýbaihana kesheni jáne turǵyn úi oramy anyqtalyp, restavratsiialaý men konservatsiialaý jumystary júrgizildi.
Úsh jylǵa sozylǵan aýqymdy joba aiasynda eskertkishterdi saqtaý jáne týristerdiń qaýipsizdigin qamtamasyz etý úshin Otyrar qalasynyń aýmaǵynda beinebaqylaý kameralary ornatyldy, kósheler elektr shamdarymen jaryqtandyryldy, jaiaý júrginshiler men elektrokarlarǵa arnalǵan joldar salyndy, týristerdiń demalýyna arnalǵan oryndyqtar, sýburqaqtar, modýldik dárethanalar men qoqys jáshikteri ornatyldy.
«Otyrar qalashyǵynyń aýmaǵynda aýqymdy jumys atqaryldy. Endi Almaty Taraz, Shymkent, Túrkistan siiaqty qalalardy jáne ońtústik óńirdiń barlyq negizgi mádeni-tarihi obektilerin qamtityn «Uly Jibek joly» grand-marshrýtyn qurý qajet. Týristerge Tarazdaǵy Aisha bibi, Babadja hatýn, Tekturmas kesenelerin, odan ári Shymkenttegi Ibrahim ata kesenesi men tsitadeldi, Túrkistandaǵy Arystan bab jáne Ahmet Iassaýi keseneleri, keiin Otyrar jáne Saýran qalashyqtary siiaqty tarihi-mádeni nysandar kiretin týristik baǵyt usyný qajet. Eger týrpaketter durys uiymdastyrylsa, bul baǵyt sheteldikter úshin ǵana emes, jergilikti týrister úshin de qyzyqty bolady», - dedi Dáýren Abaev.
Óz kezeginde otandyq týroperatorlar halyqty 1-7 kún ishinde kieli jáne tarihi oryndarǵa aparý boiynsha týrlar usynýǵa daiyn ekenin jetkizdi.
Aita keteiik, endi Otyrar qalashyǵy ashyq aspan astyndaǵy mýzei retinde jumys istep, týristerdi qabyldaidy.
