Túrkistan oblysynyń ákimi Darhan Satybaldy Otyrar aýdanyna jumys saparymen bardy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Óńir basshysy turǵyndarmen erkin pikir almasyp, suraqtaryna jaýap berdi.
«Búgin Otyrar aýdanyna óńirdegi quqyq qorǵaý organdarynyń, departament pen basqarma basshylary túgel kelip otyr. Qabyldaýǵa kirip, pikirlerińizdi ashyq aita alasyzdar. Ótinishterdi tyńdaimyz. Aldaǵy josparlarǵa da arnaiy toqtalamyz. Otyrardyń halqymyz úshin orny airyqsha. Túrkistanǵa jaqyn ornalasýy – aýdannyń damýyna serpin beredi. Aýdandy, aýyldardy damytý jumystary jańa qarqynmen jalǵasyn tabady», – degen Darhan Satybaldy árbir ótinishti nazarǵa alyp, tiisti jaýabyn berdi. Eldiń usynysyn, pikirin tyńdady.
Turǵyndar tarapynan jol, mektep máselesi, tarihi Otyrar kitaphanasyn jańǵyrtý, dárigerlik ambýlatoriia ashý, infraqurylym jáne ózge de usynystaryn jetkizdi.
Darhan Satybaldy Otyrar aýdanyna saparynda Otyrar aýyldyq okrýgi aýmaǵynan salynyp jatqan qýattylyǵy 50 MVT kún elektr stantsiiasynyń qurylys jumystarymen tanysty. «Arm Wind» JShS tapsyrysymen salynyp jatqan nysannyń joba quny – 14,7 mlrd. teńge. Joba tolyqtai iske qosylǵanda 50 adam turaqty, 310 adam maýsymdyq jumyspen qamtylady. Keler jyldyń basynda paidalanýǵa berý josparlanyp otyrǵan stantsiia energiia tapshylyǵyn azaityp, óńir ekonomikasyna úles qospaq. Osy stantsiia mańynda kásipkerlermen júzdesken oblys ákimi olardyń jobalarymen tanysty. Kásipkerlikke árdaiym qoldaý kórsetiletinin aitty.
Odan keiin óńir basshysy Sháýildir aýylyna tabiǵi gaz qosý sharasyna qatysty. Sháýildir aýylyn tabiǵi gazben qamtityn gaz qubyry júiesi qurylysy 4 jyl júrgizilip, biyl paidalanýǵa berilip otyr. Onyń qurylysy oblystyq biýdjet qarajaty esebinen júrgizildi. Jalpy uzyndyǵy 78,414 shaqyrymdy quraidy. Joba aiasynda 1615 turǵyn úi (10 myńǵa jýyq adam) tabiǵi gazben qamtylady. Endi turǵyndar kelip turǵan gazdy úilerine kirgizýi tiis. Basshylarǵa rizashylyǵyn bildirgen turǵyndar aýdandaǵy igi ister jalǵasa bersin degen tilekterin jetkizdi.
Óńir basshysy Otyrar aýdandyq «Belsendi uzaq ómir» áleýmettik qyzmetter kórsetý ortalyǵy» kommýnaldyq memlekettik mekemesinde de boldy. Belsendi jáne salaýatty ómir saltyn ustaný, zeinet jasyndaǵy qariialardyń belsendiligin arttyrý, ziiatkerlik, qoǵamdyq, shyǵarmashylyq ómirge tartý maqsatynda ashylǵan ortalyqta 14 adam turaqty túrde qyzmet kórsetedi. 2022 jyldyń 18 qańtarynan bastap iske qosylǵan ortalyq qarttarǵa áleýmettik-meditsinalyq, psihologiialyq jáne ózge de qyzmetterdi usynady. Aǵa býynnyń alańsyz tynyǵýyna barlyq jaǵdai jasalǵan.
