Qyrǵyzstannyń burynǵy prezidenti Roza Otýnbaeva Qazaqstanmen shekaradaǵy máseleni sheshý úshin prezidentter deńgeiinde kelissóz júrgizý kerek dep málimdedi. Azattyqtyń Qyrǵyz redaktsiiasynyń habarlaýynsha, Roza Otynbaeva bul týraly 13 qazanda Bishkekte "Ádil sailaý úshin" qozǵalysy ótkizgen baspasóz konferentsiiasynda aitty.
"Eń bastysy, prezident tarapynan birinshi qadam jasalýy tiis. Prezident óziniń jaýapkershiligin sezinedi me, biledi me? Tipten keshirim suramaǵan kúnniń ózinde, Qazaqstan prezidentiniń babyn tabý kerek" dedi Otynbaeva eki el shekarasynda qalyptasqan jaǵdaiǵa qatysty.
Otynbaevanyń pákirinshe, bul másele úkimet deńgeiinde sheshilmeidi.
Qazaqstanmen shekara máselesi 10 qazanda, Qyrǵyzstan prezidenti prezident Almazbek Atambaev Qazaqstan biligin eldiń ishki isine aralasyp otyr dep aiyptaǵan soń qiyndai túsken. Qyrǵyzstannyń shekara qyzmetiniń málimetine qaraǵanda, Qazaqstan shekaradan ótkizý tártibin kúsheitken.
Osy aptada eki el úkimetteri shekaradaǵy jaǵdaiǵa qatysty bir-birine jaýap málimdemelerin jasaǵan.
Al búgin Qazaqstan Ortalyq sailaý komissiiasy Qyrǵyzstandaǵy 15 qazanda ótetin prezident sailaýyna jeke memleket retinde baqylaý jasamaitynyn málimdegen.
11 qazanda Qazaqstan UQK "memlekettik shekarada josparly shekara operatsiiasy" bastalyp, adamdardy, kólikter men taýar jáne júkti tekserý kúsheitilgenin habarlaǵan.
13 qazanda Qyrǵyzstannyń memlekettik shekaradan ótkizý protsedýrasy "birshama ońtailandyrylǵanyn" málimdedi.
