Ońtústik Qazaqstan oblystyq ardagerler keńesi Otyrar aýdanynda «Ótkenniń ónegesi – búginginiń baǵa jetpes bailyǵy» taqyrybymen oblystyq seminar ótkizdi, dep habarlaidy Ult.kz tilshisi.
Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasy negiz bolǵan seminarǵa Otyrar aýdany ákiminiń orynbasary Perdehan Japparqulov, óńirdegi barlyq aýdan jáne qala ardagerleri keńesiniń tóraǵalary men ájeler alqasynyń tóraiymdary, ishki saiasat jáne jastar ortalyqtarynyń basshylary, ziialy qaýym jáne buqaralyq aqparat quraldarynyń ókilderi, jastar, mektep oqýshylary hám ustazdar qatysty.
Jiyndy oblys ákiminiń janyndaǵy «Yrys aldy – yntymaq» forýmynyń hatshysy, jazýshy Marhabat Baiǵut júrgizdi.
Oblystyq ardagerler keńesi tórt jyldan beri «Ata-baba dástúri urpaqqa amanat» baǵdarlamasynyń aiasynda «Otandy súiý – urpaqqa amanat», «Bilimdi urpaq – memleket tiregi», «Áje – otbasynyń uiytqysy» taqyryptarymen aýdan, qalalarda, shalǵai eldi mekenderde túrli kezdesýler, «dóńgelek ústel» májilisteri, keńester ótkizip keledi. Al, búgingi sharanyń maqsaty – Elbasynyń rýhani jańǵyrý maqalasyn negizge alyp, halyqtyń ulttyq sanasyn, tól tarihyn, mádenietin, salt-dástúrin, ádebin jańasha turpatta qaita túletýge atsalysý. Sóitip, Memleket basshysy alǵa qoiǵan mindetterin iske asyrýǵa úles qosý.
Saltanatty jiyn sońynda ardagerler keńesiniń tóraǵasy J.Máýlenqulov oblystyq ardagerler keńesi tóralqasynyń sheshimimen «El aǵasy» degen atalymnyń taǵaiyndalǵandyǵyn jáne ol atalymnyń jylyna bir ret el ishindegi birlik pen yntymaqtyń, tatýlyqtyń uiytqysyndai bolǵan aǵa býynǵa beriletindigin habarlady. Jańa atalymnyń alǵashqy iegerleri bolyp jazýshy Erkinbek Turys, soǵys ardageri, jazýshy Ádiham Shilterhanov, sport salasynyń maitalmany Mahambet Saparbaev, Maqtaaral aýdanynyń qurmetti azamaty, tyl eńbekkeri Taiyrhan Dosaev tanyldy.
