Ótken táýlikte Qazaqstanda koronavirýs infektsiiasyn juqtyrǵany zerthanada dáleldengen 2 877 adam tirkeldi. Bul jóninde densaýlyq saqtaý ministrligi habarlady.
Beisenbide koronavirýstan 31 adam, "oǵan uqsas pnevmoniiadan" 7 adam qaitys boldy.
Diagnozy PTR ádisimen dáleldengender arasynda eldiń eki iri qalasy alda tur. Covid-pen Almatyda 697 adam, Nur-Sultanda – 570 adam tirkeldi. Aimaqtar arasynda Qaraǵandy oblysy alda tur, munda bir táýlik ishinde 235 naýqas anyqtalǵan.
Byltyrǵy naýryzdan beri Qazaqstanda koronavirýs juqtyrǵandardyń resmi kórsetkishi 322 695 adamǵa jetti, 3 699 adam kóz jumdy.
29 sáýir, beisenbi kúni elde PTR testi teris nátije kórsetse de, simptomdary koronavirýsqa uqsaityn "kovid tektes pnevmoniiamen" aýyrǵan 98 naýqas tirkeldi, Indet órshigen byltyrǵy tamyzda beri júrgiziletin bul sanaqqa 52 942 adam engen. Resmi málimet boiynsha, "kovid tektes pnevmoniiadan" 801 adam qaitys bolǵan.
1 mamyrdaǵy málimet boiynsha, Qazaqstanda 42 510 adam koronavirýs infektsiiasynan (42 019 kisi Covid-tan, 491 adam "soǵan uqsas pnevmoniiadan") emdelip jatyr, sonyń ishinde 14 843 patsient statsionarda, 27 677 naýqas ambýlatoriialyq deńgeide em alyp jatyr.
Osy kúni 769 adamnyń jaǵdaiy aýyr, 184-iniń jaǵdaiy óte aýyr, 125 naýqas ókpe jeldetkish apparatta jatyr.
Ótken táýlikte 3062 adam koronavirýs dertinen emdelip shyqty.
Senbi kúni densaýlyq saqtaý ministrligi koronavirýs vaktsinasynyń birinshi komponenti 1,3 milliondai adamǵa, ekinshi komponenti 266 myńdai adamǵa salynǵanyn habarlady. Qazir elde Reseide ázirlenip, Qaraǵandyda shyǵarylǵan "Spýtnik V" jáne otandyq QazVac vaktsinalary salynyp jatyr. 30 sáýirde densaýlyq ministri Aleksei Tsoi Birikken Arab Ámirlikterinde óndirilgen qytailyq Sinopharm kompaniiasynyń vaktsinasy da jaqyn arada aimaqtarǵa jiberiletinin aitty.
Amerikalyq Djons Hopkins ýniversitetiniń deregine qaraǵanda álemde koronavirýs juqtyrǵan 151 millionnan astam jaǵdai tirkelgen, 3,1 milliondai adam Covid-ten kóz jumǵan. Juqtyrǵandardyń eń kóp kórsetkishi AQSh, Úndistan, Braziliia, Frantsiia jáne Túrkiiada tirkelgen. Jaqynda Túrkiiada koronavirýs juqtyrǵandar sany Reseidegiden asyp ketti.
Aimaqtar boiynsha koronavirýs juqtyrǵandardyń tolyq deregi:
Aimaqtar boiynsha:
Nur-Sultan qalasy - 570
Almaty qalasy - 697
Shymkent qalasy - 105
Aqmola oblysy - 148
Aqtóbe oblysy - 117
Almaty oblysy - 210
Atyraý oblysy - 83
Shyǵys Qazaqstan oblysy - 97
Jambyl oblysy - 71
Batys Qazaqstan oblysy - 155
Qaraǵandy oblysy - 235
Qostanai oblysy - 28
Qyzylorda oblysy - 87
Mańǵystaý oblysy - 60
Pavlodar oblysy - 165
Soltústik Qazaqstan oblysy - 25
Túrkistan oblysy - 24
