Ótken aptada elimiz boiynsha 3059 qylmys tirkelgen. Onyń 515-i urlyq-qarlyq bolsa, 18 adam kisi qolynan ólim tapqan, dep habarlaidy QazAqparat.
Bul týraly Ishki ister ministrliginiń resmi ókili Nurdildá Oraz vedomstvonyń aqparat alańynda ótken olnain brifingide aitty.
«Bir apta ishinde 3059 qylmys jasaldy, onyń 2035-i táýlik ishinde ashyldy.
Politsiia qyzmetkerleri «izin sýytpai» 11 kisi óltirýdi, 7 ólimge ákep soqqan densaýlyqqa qasaqana aýyr ziian keltirýdi, 4 qaraqshylyq, 42 tonaý jáne 515 bóten múlikti urlaý qylmystaryn ashty», - dedi IIM ókili.
Atalǵan sharada shetelden ákelingen kólik ieliriniń jolda júri tártibi týraly derekter aityldy. Mysaly, Qostanai oblysynda «qyrǵyz nómirli» kólik 91 ret «Sergekke» túsken.
«Bul sanattaǵy jol qozǵalysyna qatysýshylardyń tártibine qatysty másele bar. Mysaly, Shyǵys Qazaqstan oblysynda 182 myń teńgeniń 25 uiǵarymy rásimdelgen Lexus anyqtaldy. Ishki ister qyzmetkerleriniń aralasýymen búkil aiyppul tólendi. Qostanai oblysynda «VAZ» markaly bir kólikke 478 myń teńgeniń aiyppuly jazylǵan 51 uiǵarym rásimdelgen. Taǵy osy óńirde Qyrǵyz Respýblikasynda tirkeýde turǵan Toyota Estimo kóligine 91 ret jol qaýipsizdigin buzǵany úshin 1,1 mln teńge aiyppul salynyp, túgel óndirildi. Pavlodar oblysynda Reseide tirkeýi bar Hunday avtomobiliniń iesi 69 ret jol erejesin buzyp, 751 myń teńge aiyppul tóledi», - dedi QR IIM Ákimshilik politsiia komiteti tóraǵasynyń orynbasary Serik Túsipov.
