Soltústik Qazaqstan oblysy Aqqaiyń aýdanynda temirjol ótkelinen ótip bara jatqan traktor synyp, bir saǵatqa joldy japty, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, oqys oqiǵa 9 qyrkúiek kúni saǵat 21.05-te bolǵan. Aqqaiyń aýdandyq politsiia bólimine Qiialy men Smirnovo eldi mekenderiniń arasyndaǵy «Jańajol» temirjol ótkelinde K-700 traktorynyń synyp turǵany jaiynda habar túsedi.
Traktordyń rýlinde aýdandaǵy JShS biriniń 38 jastaǵy traktorshysy eki tirkeme bidaidy aýdan ortalyǵyna apara jatqan. Alaida temirjoldy kesip ótken kezde tirkemesiniń biriniń
artqy dońǵalaǵynyń shúldigi (os) synyp ketken. Saldarynan synǵan shúldik ótkeldiń rezeńke jabyndysyna kirip, traktordyń qozǵalýyna kedergi keltirgen.
«Temirjoldyń dál osy ýchaskesi arqyly jolaýshylar poiyzy jii ótedi. Sol sebepti tez arada joldy bosatý qajet boldy. Temirjolshylar, sharýashylyq jumysshylary K-700-di súirep shyǵaryp jatqanda, tártip saqshylary jol qozǵalysynyń qaýipsizdigin qadaǵalady. Saǵat 22.10 minýt ketkende traktor joldan alyndy, al 15 minýttan keiin ol jerden esh kedergisiz «Almaty-Petropavl» baǵytyndaǵy 15- poiyz ótti», - deidi politseiler.
Temirjolshylar ótkeldegi zaqymdalǵan rezeńke jabyndyny aýystyrdy. Al tekserý barysynda K-700 traktory júrgizýshisiniń kólikti basqarýǵa ruqsat beretin qujattary bolmai shyqty.
Tártip saqshylary oǵan temirjol ótkelin zaqymdaǵany úshin de ákimshilik is jinap, materialdy sotqa berýge ázirlep jatyr.
